ಎರಡನೆ ಪರಮಾಣು ಇಂಧನ ಪುನರ್‌ ಸಂಸ್ಕರಣ ಸಂಕೀರ್ಣ

ನವದೆಹಲಿ (ಪಿಟಿಐ): ದೇಶದಲ್ಲಿ ಪರ­ಮಾಣು ಸ್ಥಾವರಗಳ ಸಂಖ್ಯೆ ಹೆಚ್ಚುತ್ತಿ­ರುವ ಹಿನ್ನೆಲೆಯಲ್ಲಿ ಪರಮಾಣು ಇಂಧನ ಪುನರ್‌ಸಂಸ್ಕರಣೆಗೆ ಎರಡನೇ ಪರಮಾಣು ಇಂಧನ ಸಂಕೀರ್ಣವನ್ನು ರಾಜಸ್ತಾನದಲ್ಲಿ ಸ್ಥಾಪಿಸಲಾಗುತ್ತಿದೆ.

ರಾಜಸ್ಥಾನದ ಕೋಟಾದಲ್ಲಿ ರಾವಭಾಟಾ ಪರಮಾಣು ಸ್ಥಾವರದ ಬಳಿ 2400 ಕೋಟಿ ರೂಪಾಯಿಗಳ ವೆಚ್ಚದಲ್ಲಿ ಪರಮಾಣು ಇಂಧನ ಸಂಕೀರ್ಣವನ್ನು ಸ್ಥಾಪಿಸಲಾಗುತ್ತಿದೆ.

ಭಧ್ರತೆಗೆ ಸಂಬಂಧಿಸಿದ ಸಚಿವ ಸಂಪುಟ ಸಮಿತಿಯು ಈಗಾಗಲೇ ಈ ಸಂಕೀರ್ಣ ಸ್ಥಾಪನೆಗೆ ಹಸಿರು ನಿಶಾನೆ ತೋರಿಸಿದೆ. ಪರಮಾಣು ಇಂಧನ ಬೇಡಿಕೆ­ ಗಮನದಲ್ಲಿ ಇಟ್ಟು­ಕೊಂಡು ಎರಡನೇ ಸಂಕೀರ್ಣವನ್ನು ಆರಂಭಿ­ಸಲು ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು  ಮೂಲಗಳು ತಿಳಿಸಿವೆ.

12ನೇ ಪಂಚವಾರ್ಷಿಕ ಯೋಜನೆ­ಯಲ್ಲಿ ದೇಶದಲ್ಲಿ 17,300 ಮೆ. ವಾ. ಪರಮಾಣು ವಿದ್ಯುತ್‌ ಉತ್ಪಾದಿಸುವ ಗುರಿ ಹಾಕಿಕೊಳ್ಳ­ಲಾಗಿದೆ. ದೇಶದಲ್ಲಿ ಪ್ರಸಕ್ತ 5500 ಮೆ. ವಾ. ಪರಮಣು ವಿದ್ಯುತ್‌ ಉತ್ಪಾದಿಸಲಾಗುತ್ತಿದೆ.

ಹರಿಯಾಣದ ಗೋರಕ್‌ಪುರ, ಮಹಾರಾಷ್ಟ್ರದ ಜೈತಾಪುರ ಮತ್ತು ಗುಜರಾತ್‌ದ ಮಿತಿವೃದ್ಧಿಯಲ್ಲಿ ಸ್ಥಾಪಿ­ಸಲಾ­ಗುತ್ತಿರುವ ಪರಮಾಣು ಸ್ಥಾವರ­ಗಳ ಪರಮಾಣು ಇಂಧನ ಅಗತ್ಯವನ್ನು ಕೋಟಾದ ಪರಮಾಣು ಇಂಧನ ಪುನರ್‌ಸಂಸ್ಕರಣ ಸಂಕೀರ್ಣವು ಪೂರೈಸಲಿದೆ.