ಕಲ್ಲಿದ್ದಲು ಹಂಚಿಕೆ ವಿವರ ಬಹಿರಂಗಕ್ಕೆ ನಕಾರ

ನವದೆಹಲಿ (ಪಿಟಿಐ): ಕಲ್ಲಿದ್ದಲು ನಿಕ್ಷೇಪ ಹಂಚಿಕೆ ಪ್ರಕರಣದ ಕುರಿತು ಸಿಬಿಐ ತನಿಖೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಪ್ರಕರಣಕ್ಕೆ ಸಂಬಂಧಿಸಿದ ಯಾವುದೇ ವಿವರಗಳನ್ನು ನೀಡಲು ಪ್ರಧಾನಿ ಕಾರ್ಯಾಲಯ ನಿರಾಕರಿಸಿದೆ.

`ಹಗರಣಕ್ಕೆ ಸಂಬಂಧಿಸಿ ಸಿಬಿಐ ತನಿಖೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಮಾಹಿತಿ ಹಕ್ಕು ಕಾಯ್ದೆ 8ನೇ ವಿಧಿ ಪ್ರಕಾರ ಯಾವುದೇ ರೀತಿಯ ಮಾಹಿತಿಗಳನ್ನು ಬಹಿರಂಗಗೊಳಿಸುವುದನ್ನು ತಡೆಹಿಡಿಯಲಾಗಿದೆ~ ಎಂದು ಪ್ರಧಾನಿ ಕಾರ್ಯಾಲಯ ತಿಳಿಸಿದೆ.

ಮಾಹಿತಿ ಹಕ್ಕು ಕಾಯ್ದೆ ಆಧಾರದಲ್ಲಿ, ಕಲ್ಲಿದ್ದಲು ಸಚಿವರು ಮತ್ತು ಪ್ರಧಾನಿ ನಡುವೆ ನಡೆದ ಎಲ್ಲಾ ಮಾತುಕತೆಗಳು, ಅಂತಿಮ ನಿರ್ಧಾರದ ಪ್ರತಿಗಳು, ಅನುಮತಿಗಳು, ಆದೇಶಗಳು ಮತ್ತು ಕಲ್ಲಿದ್ದಲು ನಿಕ್ಷೇಪ ಹಂಚಿಕೆ ಕುರಿತಂತೆ ಕಲ್ಲಿದ್ದಲು ಸಚಿವರು ಮತ್ತು ಪ್ರಧಾನಿ ಕಾರ್ಯಾಲಯದ ನಡುವಿನ ಮಾತುಕತೆಗಳ ವಿವರ ನೀಡುವಂತೆ ನ್ಯಾಯವಾದಿ ವಿವೇಕ್ ಗಾರ್ಗ್ ಕೋರಿದ್ದರು.