ತೇಜಸ್ ಹಾರಾಟ ಯಶಸ್ವಿ

ಬೆಂಗಳೂರು: ಸ್ವದೇಶಿ ನಿರ್ಮಿತ ಲಘು ಯುದ್ಧ ವಿಮಾನ (ಎಲ್‌ಸಿಎ) ತೇಜಸ್‌ನ `ಎಲ್‌ಎಸ್‌ಪಿ 7~ ಮಾದರಿ ಇಲ್ಲಿನ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್‌ನ ವಿಮಾನ ನಿಲ್ದಾಣದಲ್ಲಿ ಭಾನುವಾರ ಯಶಸ್ವಿಯಾಗಿ ಪ್ರಥಮ ಪರೀಕ್ಷಾರ್ಥ ಹಾರಾಟ ನಡೆಸಿತು.

ಈ ಪರೀಕ್ಷಾರ್ಥ ಹಾರಾಟ ಯಶಸ್ವಿಯಾಗುವುದರ ಮೂಲಕ ತೇಜಸ್-ಎಲ್‌ಎಸ್‌ಪಿ 7 (ಲಿಮಿಟೆಡ್ ಸೀರಿಯಲ್ ಪ್ರೊಡಕ್ಷನ್) ಯುದ್ಧ ವಿಮಾನ ಪ್ರಾಥಮಿಕ ಕಾರ್ಯಾಚರಣೆಗೆ ಅನುಮತಿ (ಐಒಸಿ) ಪಡೆಯುವತ್ತ ಒಂದು ಹೆಜ್ಜೆ ಮುಂದಿಟ್ಟಂತೆ ಆಗಿದೆ ಎಂದು ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆಯ (ಡಿಆರ್‌ಡಿಒ) ಪ್ರಕಟಣೆ ತಿಳಿಸಿದೆ.

ಐಒಸಿ ದೊರೆತ ನಂತರ ಎಲ್‌ಎಸ್‌ಪಿ 7 ಮತ್ತು 8 ಮಾದರಿಯ ಯುದ್ಧ ವಿಮಾನಗಳನ್ನು ಪರೀಕ್ಷಾರ್ಥ ಬಳಕೆಗೆ ವಾಯುಪಡೆಗೆ ಹಸ್ತಾಂತರ ಮಾಡಲಾಗುವುದು. ಗ್ರೂಪ್ ಕ್ಯಾಪ್ಟನ್ ಕೆ.ಕೆ. ವೇಣುಗೋಪಾಲ್ ಅವರು 28 ನಿಮಿಷಗಳ ಕಾಲ ವಿಮಾನ ಹಾರಿಸಿದರು ಎಂದು ಪ್ರಕಟಣೆಯಲ್ಲಿ ಹೇಳಲಾಗಿದೆ.