ದಾವೂದ್‌, ಎಲ್‌ಇಟಿ ನಡುವೆ ನಂಟು

ನವದೆಹಲಿ(ಪಿಟಿಐ): ಭೂಗತಪಾತಕಿ ದಾವೂದ್‌ ಇಬ್ರಾಹಿಂ, ಲಷ್ಕರ್‌–ಎ–ತೈಯ­ಬಾ (ಎಲ್‌ಇಟಿ), ಇಂಡಿಯನ್ ಮುಜಾಹಿದೀನ್‌(ಐಎಂ) ಹಾಗೂ ಬಬ್ಬರ್‌ ಖಲ್ಸಾ ಇಂಟರ್‌ ನ್ಯಾಷನಲ್‌ (ಬಿಕೆಐ)  ನಡುವೆ ಸಂಪರ್ಕವಿತ್ತು ಎಂದು ದೆಹಲಿ ಪೊಲೀಸರು ಹೇಳಿದ್ದಾರೆ.  ಅಬ್ದುಲ್‌ ಕರೀಂ ತುಂಡಾ ವಿಚಾರಣೆಯಿಂದ ಈ ಸ್ಫೋಟಕ ಮಾಹಿತಿ ಹೊರಬಂದಿದೆ.

ತುಂಡಾ ವಿರುದ್ಧ ದೆಹಲಿ ಪೊಲೀಸರು ನ್ಯಾಯಾಲಯಕ್ಕೆ ಹೆಚ್ಚುವರಿ ಆರೋಪಪಟ್ಟಿ ದಾಖಲಿಸಿದ್ದು, ತುಂಡಾ 2002ರಲ್ಲಿ ಪಾಕಿಸ್ತಾನದಲ್ಲಿ ಬಿಕೆಐ ಮೂಲಕ ದಾವೂದ್‌ನನ್ನು ಭೇಟಿಯಾಗಿದ್ದಾನೆ. ಈ ವೇಳೆ ಭಾರತದಲ್ಲಿ ಭಯೋತ್ಪಾದಕ ದಾಳಿ ನಡೆಸುವ ಕುರಿತು ಚರ್ಚೆ ನಡೆಸಿದ್ದಾನೆ ಎಂದು ಹೇಳಿದ್ದಾರೆ. 

2002ರಲ್ಲಿ ತುಂಡಾ, ದಾವೂದ್‌ನನ್ನು ಕರಾಚಿಯ ಆತನ ಮನೆಯಲ್ಲಿ ಸಂಪರ್ಕಿಸಿದ್ದಾನೆ ಎಂದು ಹೆಚ್ಚುವರಿ ಸೆಷನ್ಸ್‌ ನ್ಯಾಯಾಧೀಶ ಭರತ್‌ ಪರಾಶರ್‌ ಅವರಿಗೆ ಸಲ್ಲಿಸಿರುವ ಆರೋಪ ಪಟ್ಟಿಯಲ್ಲಿ ವಿವರಿಸಲಾಗಿದೆ.