ನಿಫಾ ಶಂಕೆ: ಮಹಿಳೆ ಸಾವು

ಕೋಯಿಕ್ಕೋಡ್‌: ನಿಫಾ ವೈರಸ್‌ ಸೋಂಕು ಹರಡಿರುವ ಶಂಕೆ ಮೇಲೆ ನಿಗಾದಲ್ಲಿ ಇಡಲಾಗಿದ್ದ 39 ವರ್ಷದ ಮಹಿಳೆ ಶನಿವಾರ ಮೃತಪಟ್ಟಿದ್ದಾರೆ.

ಕೋಯಿಕ್ಕೋಡ್‌ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ಇವರಿಗೆ ಚಿಕಿತ್ಸೆ ನೀಡಲಾಗುತ್ತಿತ್ತು. ಮೇಲುನೋಟಕ್ಕೆ ನಿಫಾ ವೈರಸ್‌ ಸೋಂಕಿನ ಲಕ್ಷಣಗಳು ಕಾಣಿಸಿಕೊಂಡ ಕಾರಣ ಇವರನ್ನು ಪರೀಕ್ಷೆಗೆ ಒಳಪಡಿಸಲಾಗಿತ್ತು.

‘ಪ್ರಯೋಗಾಲಯಕ್ಕೆ ಕಳುಹಿಸಿದ ರಕ್ತದ ಮಾದರಿಯಲ್ಲಿ ಸೋಂಕು ಕಂಡುಬಂದಿಲ್ಲ. ಸಾವಿನ ಕಾರಣ ಖಚಿತವಾಗಿಲ್ಲ’ ಎಂದು ಕೇರಳ ಆರೋಗ್ಯ ಸಚಿವೆ ಕೆ.ಕೆ. ಶೈಲಜಾ ಹೇಳಿದ್ದಾರೆ. ಆರೋಗ್ಯ ಅಧಿಕಾರಿಗಳು ನಿಫಾ ವೈರಸ್‌ ಶಂಕೆಯ ಮೇರೆಗೆ 1,949 ಜನರ ಪಟ್ಟಿ ತಯಾರಿಸಿದ್ದಾರೆ. ಇಬ್ಬರಲ್ಲಿ ನಿಫಾ ವೈರಸ್‌ ಇರುವುದು ಖಚಿತವಾಗಿದ್ದು, ಅವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ.

ಈ ಮಧ್ಯೆ ಕೇರಳ ಲೋಕಸೇವಾ ಆಯೋಗವು ಇದೇ ತಿಂಗಳ 16ರವರೆಗೆ ನಡೆಯಬೇಕಿದ್ದ ಪರೀಕ್ಷೆಗಳನ್ನು ಮುಂದೂಡಿದೆ. ಅಲ್ಲದೆ ಎರಡು ಜಿಲ್ಲೆಗಳಲ್ಲಿ ಎಲ್ಲ ರೀತಿಯ ಸಭೆಗಳನ್ನು ರದ್ದುಪಡಿಸಲಾಗಿದೆ.