ಮುಂಬೈನಲ್ಲಿ ಭಾರಿ ಮಳೆ: ಸಂಚಾರಕ್ಕೆ ಅಡಚಣೆ

ಮುಂಬೈ (ಪಿಟಿಐ): ಮಹಾನಗರದಲ್ಲಿ ಸೋಮವಾರ ನಿರಂತರವಾಗಿ ಬಿದ್ದ ಭಾರಿ ಮಳೆಯ ಪರಿಣಾಮ ರಸ್ತೆ, ರೈಲು ಹಾಗೂ ವಿಮಾನಗಳ ಸಂಚಾರ ಅಸ್ತವ್ಯಸ್ತಗೊಂಡಿದ್ದು, ಲಕ್ಷಾಂತರ ಜನರು ತೊಂದರೆ ಅನುಭವಿಸಿದರು.

ಭೋವಿವಾಡ, ಮಾಹೀಮ್ ಹಾಗೂ ಮಾತುಂಗಾದಲ್ಲಿ ರಭಸವಾಗಿ ನೀರು ಹರಿಯುತ್ತಿದ್ದರಿಂದ ಜನರು ಪರದಾಡುವಂತಾಯಿತು ಎಂದು ಮುಂಬೈ ಪಾಲಿಕೆ ಅಧಿಕಾರಿಗಳು ತಿಳಿಸಿದ್ದಾರೆ.

ರೈಲು ಹಳಿಗಳಲ್ಲಿ ನೀರು ನಿಂತಿದ್ದರಿಂದ ಮಧ್ಯ ಮುಂಬೈ ಹಾಗೂ ಬಂದರು ಪ್ರದೇಶದಲ್ಲಿ ರೈಲು ಸಂಚಾರ ವಿಳಂಬಗೊಂಡಿತ್ತು. ವಿಮಾನ ಹಾರಾಟ ಕೂಡ ಅರ್ಧಗಂಟೆ ತಡವಾಗಿತ್ತು ಎಂದು ಮೂಲಗಳು ತಿಳಿಸಿವೆ.