ಶೀಘ್ರ ಹಳಿ ಏರಲಿರುವ ರೈಲ್ವೆ ಭೀಮ್

ನವದೆಹಲಿ (ಪಿಟಿಐ): ಹೆಚ್ಚು ಬೋಗಿಗಳಿರುವ  ರೈಲುಗಳನ್ನು ಎಳೆಯುವ 5500 ಎಚ್.ಪಿ ಸಾಮರ್ಥ್ಯದ ಡೀಸೆಲ್ ಎಂಜಿನ್ `ಭೀಮ~ನನ್ನು ಬಳಕೆಗೆ ಸಮರ್ಪಿಸಲು ರೈಲ್ವೆ ಇಲಾಖೆ ಸಜ್ಜಾಗಿದೆ.ಗಂಟೆಗೆ ಗರಿಷ್ಠ 100 ಕಿ.ಮೀ. ವೇಗದಲ್ಲಿ ಸಂಚರಿಸುವ ಈ ಎಂಜಿನ್‌ನಲ್ಲಿ ಅತ್ಯಾಧುನಿಕ ಸೌಲಭ್ಯಗಳನ್ನು ಅಳವಡಿಸಲಾಗಿದೆ.

ಪ್ರಸ್ತುತ ಈ ಎಂಜಿನ್ನಿನ ಸುರಕ್ಷತಾ ಪ್ರಯೋಗ ಈಗಾಗಲೇ ಆರಂಭವಾಗಿದೆ. ವಾರಾಣಸಿಯಲ್ಲಿರುವ ರೈಲ್ವೆ ಡೀಸೆಲ್ ಎಂಜಿನ್ ಕಾರ್ಖಾನೆಯಲ್ಲಿ 17 ಕೋಟಿ ರೂಪಾಯಿ ವೆಚ್ಚದಲ್ಲಿ ಇದನ್ನು ತಯಾರಿಸಲಾಗಿದೆ.

ಪ್ರಸ್ತುತ ರೈಲ್ವೆ ಇಲಾಖೆಯಲ್ಲಿ 4500 ಎಚ್.ಪಿ ಸಾಮರ್ಥ್ಯದ ಎಂಜಿನ್ನುಗಳಿದ್ದು, `ಭೀಮ~ದ ಅಳವಡಿಕೆಯೊಂದಿಗೆ ರೈಲುಗಳ ಸಾಗಣೆ ಸಾಮರ್ಥ್ಯ ಗಣನೀಯವಾಗಿ ಅಧಿಕವಾಗಲಿದೆ ಎಂದು ರೈಲ್ವೆ ಸಚಿವಾಲಯದ ಹಿರಿಯ ಅಧಿಕಾರಿ ಹೇಳಿದ್ದಾರೆ.

2012-13ರ ಹಣಕಾಸು ವರ್ಷದಲ್ಲಿ ಇಂತಹ 15 ಎಂಜಿನ್‌ಗಳನ್ನು ತಯಾರಿಸುವ ಗುರಿಯನ್ನು ಇಲಾಖೆ ಹೊಂದಿದೆ. ಇದೇ ವೇಳೆ ಈ ವರ್ಷದಲ್ಲಿ 102  ಕೋಟಿ ಟನ್  ಸರಕು ಸಾಗಣೆ  ಗುರಿ ಹಾಕಿಕೊಂಡಿದೆ (ಕಳೆದ ವರ್ಷಕ್ಕಿಂತ 5.5 ಕೋಟಿ ಟನ್ ಹೆಚ್ಚು)ರೈಲ್ವೆ ಇಲಾಖೆಯು ಅಮೆರಿಕ ಮೂಲದ ಇಎಂಡಿ ಕಂಪೆನಿಯ ಸಹಯೋಗದಲ್ಲಿ ಈ ಎಂಜಿನ್ ಅಭಿವೃದ್ಧಿಪಡಿಸಿದೆ.

ಇದೇ ಮೊತ್ತಮೊದಲ ಬಾರಿಗೆ ರೈಲ್ವೆ ಚಾಲನಾ ಸಿಬ್ಬಂದಿಗಾಗಿ ಎಂಜಿನ್‌ನಲ್ಲಿ ಶೌಚಾಲಯದ ವ್ಯವಸ್ಥೆ ಕಲ್ಪಿಸಿರುವುದು ಇದರ ಮತ್ತೊಂದು ವಿಶೇಷ.ಎಲೆಕ್ಟ್ರಾನಿಕ್ ಆಧಾರಿಕ ಇಂಧನ ಪೂರೈಕೆ ವ್ಯವಸ್ಥೆ ಹಾಗೂ ಮಾಲಿನ್ಯ ನಿಯಂತ್ರಣ ವ್ಯವಸ್ಥೆಗಳನ್ನು ತನ್ನಲ್ಲಿ ಅಡಕಗೊಳಿಸಿಕೊಂಡಿರುವ ಈ ಎಂಜಿನ್ ಉತ್ತಮ ಇಂಧನ ದಕ್ಷತೆಯನ್ನೂ ಹೊಂದಿದೆ.
 
ಬಿಸಿಗಾಳಿಯನ್ನು ಹೊರದೂಡುವ ಹವಾನಿಯಂತ್ರಿತ ವ್ಯವಸ್ಥೆ, ಡಿಕ್ಕಿ ತಡೆ ಸಾಧನಗಳ ಅಳವಡಿಕೆ, ವಿಶಿಷ್ಟ ರೀತಿಯ ಚಾಲಕ ಆಸನಗಳನ್ನು ಇದು ಒಳಗೊಂಡಿದೆ ಎಂದು ಅಧಿಕಾರಿ ವಿವರಿಸಿದ್ದಾರೆ.ಇದರ ಇಂಧನ ಟ್ಯಾಂಕಿಗೆ ಒಂದೇ ಬಾರಿಗೆ 7500 ಲೀಟರ್ ಡೀಸೆಲ್ ತುಂಬಬಹುದು.