ನವದೆಹಲಿ: ಮಹಿಳಾ ನೌಕರರು ಅನಿಶ್ಚಿತ ಕೆಲಸದ ಅವಧಿಯಲ್ಲಿ ಮನೆಯಲ್ಲೇ ಸರ್ಕಾರಿ ಕೆಲಸ ಕಾರ್ಯಗಳನ್ನು ನಿರ್ವಹಿಸಲು ಅನುಕೂಲವಾಗುವಂತೆ ಸಂಸದೀಯ ಸಮಿತಿಯೊಂದು ಮಹತ್ವದ ಶಿಫಾರಸುಗಳನ್ನು ಸರ್ಕಾರದ ಮುಂದಿಟ್ಟಿದೆ.
ಸಂಸದೀಯ ಸಮಿತಿಯ ಈ ಶಿಫಾರಸುಗಳನ್ನು ಯಥಾವತ್ತು ಅಳವಡಿಸಿದರೆ, ಮಹಿಳೆಗೆ ತಾಯಿಯಾಗಿ ಕಾರ್ಯ ನಿರ್ವಹಿಸಲು ಮತ್ತು ಸರ್ಕಾರಿ ಸಂಸ್ಥೆಗಳಲ್ಲಿ ನೌಕರಳಾಗಿ ದುಡಿಯಲು ಕಷ್ಟವಾಗಲಾರದು. ಆಗ ಆಕೆಗೆ ಕೆಲಸದ ಅವಧಿಯಲ್ಲೇ ತನ್ನ ಮಗುವನ್ನು ನೋಡಿಕೊಳ್ಳಲು ಸಾಧ್ಯ ವಾಗುತ್ತದೆ. ಇದರಿಂದ ಇವೆರಡರ ಮಧ್ಯೆ ಸಂಘರ್ಷ ತಡೆಯಲು ಆಕೆಗೆ ಸಹಾಯಕವಾಗುತ್ತದೆ ಎಂದು ನಂಬಲಾಗಿದೆ.
‘ಕೆಲಸದ ಅವಧಿ ಅಥವಾ ಮಹಿಳಾ ನೌಕರರು ಮನೆಯಲ್ಲೇ ದುಡಿಯಲು ನೆರವಾಗುವ ನೀತಿ’ಯೊಂದನ್ನು ರೂಪಿಸುವ ಸಾಧ್ಯತೆಗಳನ್ನು ಪರಿಶೋಧಿಸುವಂತೆ ಸಿಬ್ಬಂದಿ ಮತ್ತು ತರಬೇತಿ ಸಚಿವಾಲಯಕ್ಕೆ ಸೂಚಿಸಿ ಸಿಬ್ಬಂದಿ, ಸಾರ್ವಜನಿಕ ಕುಂದುಕೊರತೆ, ಕಾನೂನು ಹಾಗೂ ನ್ಯಾಯಾಂಗದ ಮೇಲಿನ ಸಂಸದೀಯ ಸ್ಥಾಯಿ ಸಮಿತಿ ಇತ್ತೀಚೆಗಷ್ಟೇ ಮುಕ್ತಾಯವಾದ ಸಂಸತ್ ಅಧಿವೇಶನದಲ್ಲಿ ತನ್ನ ವರದಿ ಮಂಡಿಸಿದೆ.
ಸರಳ ಸಮಯ ಮತ್ತು ಸುಲಭ ಸ್ಥಳ ಹಾಗೂ ಮಕ್ಕಳು ಚಿಕ್ಕವರಿರುವಾಗ ಅರ್ಧ ಅವಧಿಯ ಕೆಲಸ ನಿರ್ವಹಿಸಲು ಅನುವು ಮಾಡುವಂತೆ ನೌಕರರು ಕೇಳಿರುವ ಬೇಡಿಕೆಯನ್ನು ಅಳವಡಿಸಲು ಸಂಸದೀಯ ಸಮಿತಿ ಸೂಚಿಸಿದೆ. ಹಿಂದಿನ ವೇತನ ಆಯೋಗಗಳಲ್ಲಿ ಶಿಫಾರಸು ಕಂಡಿದ್ದ ಈ ಬೇಡಿಕೆಯನ್ನು ಆರನೇ ವೇತನ ಆಯೋಗ ತಿರಸ್ಕರಿಸಿತ್ತು.
ವಿವಿಧ ರಾಷ್ಟ್ರಗಳಲ್ಲಿ ಉದ್ಯೋಗದಲ್ಲಿರುವ ಮಹಿಳೆಯರಿಗೂ ಸೌಲಭ್ಯಗಳನ್ನು ಕಲ್ಪಿಸುವ ವಿಷಯವನ್ನೂ ಸಂಸದೀಯ ಸಮಿತಿ ಪ್ರಸ್ತಾಪಿಸಿದೆ.
ಈ ಮಹಿಳಾ ನೌಕರರಿಗೆ ದೀರ್ಘಾವಧಿಯ ಹೆರಿಗೆ ರಜೆ ಅಥವಾ ದೈನಂದಿನ ಸುರಕ್ಷಾ ಕೇಂದ್ರಗಳು, ಕೆಲಸವನ್ನು ಆರಂಭಿಸಲು ಮತ್ತು ಮುಗಿಸಲು ಅನಿಶ್ಚಿತ ಕೆಲಸದ ಅವಧಿ, ಹೆಚ್ಚುವರಿ ಮತ್ತು ರಾತ್ರಿಪಾಳಿ ಕೆಲಸಗಳಿಗೆ ನಿರ್ಬಂಧ, ಮಗು ಮೂರು ವರ್ಷವಾಗುವ ತನಕ ದಿನದಲ್ಲಿ ಎರಡು ಗಂಟೆ ಅಲ್ಪಾವಧಿಯ ರಜೆ, ಮಗುವನ್ನು ನೋಡಿಕೊಳ್ಳಲು ಅನುಕೂಲವಾಗುವಂತೆ ಪೋಷಕರಿಗೆ ಮಗು ಸಂರಕ್ಷಣಾ ರಜೆ, ಮಹಿಳೆಗೆ ಹೆರಿಗೆ ರಜೆ ಇತ್ಯಾದಿ ಸೌಲಭ್ಯ ಒದಗಿಸಲು ಸಮಿತಿ ತಿಳಿಸಿದೆ.
ಹೆರಿಗೆ ರಜೆ ಮಂಜೂರು ಮಾಡುವಲ್ಲಿ ವಿವಿಧ ಸಂಸ್ಥೆಗಳು ವಿಭಿನ್ನ ನೀತಿಗಳನ್ನು ಅಳವಡಿಸುತ್ತಿರುವ ಬಗ್ಗೆ ಸಮಿತಿ ಗಮನ ಸೆಳೆದಿದೆ. ಕೆಲವು ಸಂಸ್ಥೆಗಳು 180 ದಿನ, ಇನ್ನು ಕೆಲವು 135 ದಿನ, 90 ದಿನ, 84 ದಿನ ಮಾತ್ರ ಹೆರಿಗೆ ರಜೆ ನೀಡುತ್ತಿವೆ ಎಂದು ಹೇಳಿದೆ. ಸರ್ಕಾರಿ ಮತ್ತು ಅದರ ನಿಯಂತ್ರಣದಲ್ಲಿರುವ ಎಲ್ಲ ಇಲಾಖೆಗಳು ಅಥವಾ ಸಂಸ್ಥೆಗಳಿಗೆ 180 ದಿನಗಳ ಸಮಾನ ಮಾದರಿಯ ಹೆರಿಗೆ ರಜೆ ಮಾನದಂಡವನ್ನು ಅಳವಡಿಸುವಂತೆ ಸಮಿತಿ ಸಲಹೆ ನೀಡಿದೆ.
ಇಂತಹ ಸಮಸ್ಯೆಗಳಲ್ಲಿ ಗಮನ ಸೆಳೆಯಲು ನೆರವಾಗುವಂತೆ ಸರ್ಕಾರವು ನೌಕರರ ಸಂಘಗಳೊಂದಿಗೆ ಮಾತುಕತೆ ನಡೆಸುವಾಗ ಮಹಿಳಾ ಪ್ರತಿನಿಧಿಗಳನ್ನೂ ಸೇರಿಸಿಕೊಳ್ಳಬೇಕು ಎಂದೂ ಸಮಿತಿ ಸೂಚಿಸಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.