‘ಹಣಕಾಸು ಮಸೂದೆ–2018’ ಕ್ಕೆ ಅನುಮೋದನೆ

ನವದೆಹಲಿ: ವಿರೋಧಪಕ್ಷಗಳ ಗಲಾಟೆ, ಪ್ರತಿಭಟನೆಯ ನಡುವೆಯೇ ಲೋಕಸಭೆಯಲ್ಲಿ ‘ಹಣಕಾಸು ಮಸೂದೆ–2018’  ಯಾವುದೇ ಚರ್ಚೆ ಇಲ್ಲದೆಯೇ ಬುಧವಾರ ಅನುಮೋದನೆ ಪಡೆದುಕೊಂಡಿತು.

ಏಪ್ರಿಲ್‌ 1ರಿಂದ ಆರಂಭವಾಗುವ ಮುಂದಿನ ಹಣಕಾಸು ವರ್ಷದ ₹89.25ಲಕ್ಷ ಕೋಟಿ ಖರ್ಚುವೆಚ್ಚಗಳ ‘ಧನವಿನಿಯೋಗ ಮಸೂದೆ’ ಬಗ್ಗೆಯೂ ಇದೇ ವೇಳೆ ಅನುಮೋದನೆ ದೊರೆಯಿತು. ಎಲ್ಲವೂ ಕೇವಲ 25 ನಿಮಿಷಗಳಲ್ಲಿ ಅಂತಿಮಗೊಂಡಿತು.

ಸದನದಲ್ಲಿ ಚರ್ಚೆ ನಡೆಸದೇ, ಎಲ್ಲಾ ಸದಸ್ಯರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಮಸೂದೆಗೆ ಅನುಮೋದನೆ ನೀಡಿದ ಕಾರಣ ವಿರೋಧ ಪಕ್ಷಗಳು ತೀವ್ರ ವಿರೋಧ ವ್ಯಕ್ತಪಡಿಸಿದವು. ಗದ್ದಲದ ನಡುವೆಯೇ ಸಂಸತ್ತಿನ ಉಭಯ ಸದನಗಳ ಕಲಾಪ 8ನೇ ದಿನವೂ ಮುಂದಕ್ಕೆ ಹೋಯಿತು.