Covid India Update| ಹೊಸ ಪ್ರಕರಣಗಳಲ್ಲಿ ಭಾರಿ ಇಳಿಕೆ: ಪಾಸಿಟಿವಿಟಿ ದರ ಶೇ 0.47

ನವದೆಹಲಿ: 24 ಗಂಟೆಗಳ ಅವಧಿಯಲ್ಲಿ ಭಾರತ 2,288 ಹೊಸ ಕೋವಿಡ್‌ ಪ್ರಕರಣಗಳನ್ನು ಕಂಡಿದೆ. ಇದರೊಂದಿಗೆ ದೇಶದ ಒಟ್ಟಾರೆ ಸೋಂಕಿತರ ಸಂಖ್ಯೆ 4,31,07,689ಕ್ಕೆ ಏರಿಕೆಯಾಗಿದೆಯಾದರೂ, ಸಕ್ರಿಯ ಪ್ರಕರಣಗಳ ಸಂಖ್ಯೆ ಇಳಿದಿದೆ. ದೇಶದ‌ ಈಗಿನ ಸಕ್ರಿಯ ಪ್ರಕರಣಗಳ ಸಂಖ್ಯೆ 19,637 ಆಗಿದೆ.

ಈ ಒಂದು ದಿನದ ಇದೇ ಅವಧಿಯಲ್ಲಿ 10 ಮಂದಿ ಕೋವಿಡ್‌ ಕಾರಣಕ್ಕೆ ಮೃತಪಟ್ಟಿದ್ದಾರೆ. ಇದರಲ್ಲಿ 6 ಸಾವು ಕೇರಳದಲ್ಲಿ , ಮೂರು ದೆಹಲಿಯಲ್ಲಿ, ಒಂದು ಪ್ರಕರಣ ಕರ್ನಾಟಕದಲ್ಲಿ ವರದಿಯಾಗಿದೆ. ಒಟ್ಟಾರೆ ಸಾವಿನ ಸಂಖ್ಯೆ 5,24,103ಕ್ಕೆ ತಲುಪಿದೆ.

ಪಾಸಿಟಿವಿಟಿ ದರ 0.47ಕ್ಕೆ ಇಳಿದಿದೆ. ಕಳೆದ ವಾರ ದೇಶದಲ್ಲಿ ಕೋವಿಡ್‌ ಪ್ರಕರಣಗಳಲ್ಲಿ ನಿರಂತರ ಏರಿಕೆ ದಾಖಲಾಗಿತ್ತು. ಆದರೆ, ಮೂರು ದಿನಗಳಿಂದ ಸೋಂಕು ಇಳಿಕೆ ಹಾದಿಯಲ್ಲಿದೆ.

ದೇಶದಲ್ಲಿ ಈ ವರೆಗೆ 190.50 ಕೋಟಿ ಕೋವಿಡ್‌ ಲಸಿಕೆ ಡೋಸ್‌ಗಳನ್ನು ನೀಡಲಾಗಿದೆ ಎಂದು ಕೇಂದ್ರ ಆರೋಗ್ಯ ಇಲಾಖೆ ಹೇಳಿದೆ.