ಅಲ್‌ಕೈದಾ ಉಗ್ರ ಮುಸಾ ಹತ್ಯೆ: ಕಾಶ್ಮೀರದಲ್ಲಿ ಕರ್ಫ್ಯೂ

ಶ್ರೀನಗರ: ಅಲ್‌ ಖೈದಾ ಸಂಘಟನೆಯೊಂದಿಗೆ ಸಂಪರ್ಕ ಹೊಂದಿದ್ದಾನೆ ಎನ್ನಲಾದ ಉಗ್ರ ಜಾಕೀರ್‌ ಮುಸಾ ಹತ್ಯೆಯಾಗಿದ್ದರಿಂದ ಗಲಭೆ ಉಂಟಾಗುವ ಸಾಧ್ಯತೆ ಇರುವುದರಿಂದ ಕಾಶ್ಮೀರದ ಹಲವು ಕಡೆಗಳಲ್ಲಿ ಶುಕ್ರವಾರ ಕರ್ಫ್ಯೂ ಜಾರಿಗೊಳಿಸಲಾಗಿದೆ.

ಶಾಲಾ–ಕಾಲೇಜುಗಳಿಗೆ ರಜೆ ಘೋಷಿಸಲಾಗಿತ್ತು. ಸಾಮಾಜಿಕ ಜಾಲತಾಣದ ಮೇಲೂ ನಿರ್ಬಂಧ ವಿಧಿಸಲಾಗಿದೆ. ಅನ್ಸರ್‌ ಘಜ್‌ವಾತ್ ಉಲ್‌ ಹಿಂದ್‌ (ಎಜಿಯುಹಿ) ಎಂಬ ಸಂಘಟನೆಯ ಮುಖಸ್ಥನಾಗಿದ್ದ ಮುಸಾನನ್ನು ತ್ರಾಲ್‌ನಲ್ಲಿ ನಡೆದ ಎನ್‌ಕೌಂಟರ್‌ನಲ್ಲಿ ಗುರುವಾರ ಹತ್ಯೆ ಮಾಡಲಾಗಿದೆ.

ಈ ಕಾರ್ಯಾಚರಣೆಯಲ್ಲಿ ಇಬ್ಬರು ಉಗ್ರರು ಹತ್ಯೆಯಾಗಿದ್ದಾರೆ. ಅವರು ಯಾವ ಸಂಘಟನೆಗೆ ಸೇರಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿಲ್ಲ. ಮುಸಾ ಸಾವನ್ನಪ್ಪಿದ್ದಾನೆ ಎಂಬುದನ್ನು ಅವರು ಕುಟುಂಬ ಸಹ ಖಚಿತಪಡಿಸಿದ್ದಾರೆ.