ಕಾಲರ್ ಟ್ಯೂನ್‌ನಿಂದ ಅಮಿತಾಭ್‌ ಧ್ವನಿ ತೆಗೆಯಲಾಗಿದೆ: ದೆಹಲಿ ಹೈಕೋರ್ಟ್‌

ನವದೆಹಲಿ: ಕೊರೊನಾ ಸೋಂಕು ಹರಡುವುದನ್ನು ತಡೆಯಲು ವಹಿಸಬೇಕಾದ ಮುನ್ನೆಚ್ಚರಿಕೆ ಕ್ರಮಗಳ ಕುರಿತ ಬಾಲಿವುಡ್‌ ನಟ ಅಮಿತಾಭ್‌ ಬಚ್ಚನ್ ಅವರ ಧ್ವನಿಯನ್ನು ಕಾಲರ್ ಟ್ಯೂನ್‌ನಿಂದ ತೆಗೆದು ಹಾಕಲಾಗಿದೆ ಎಂದು ದೆಹಲಿ ಹೈಕೋರ್ಟ್ ತಿಳಿಸಿದೆ.

ಈ ಬಗ್ಗೆ ಸಲ್ಲಿಸಲಾಗಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯನ್ನು ಸೋಮವಾರ ವಜಾಗೊಳಿಸಿರುವ ನ್ಯಾಯಾಲಯ, ‘ಈಗಾಗಲೇ ಕಾಲರ್‌ ಟ್ಯೂನ್‌ನಿಂದ ಅಮಿತಾಭ್‌ ಬಚ್ಚನ್‌ ಅವರ ಧ್ವನಿಯನ್ನು ತೆಗೆದು ಹಾಕಲಾಗಿದೆ. ಹಾಗಾಗಿ ಈ ಅರ್ಜಿಯ ವಿಚಾರಣೆ ಅಗತ್ಯವಿಲ್ಲ’ ಎಂದು ಮುಖ್ಯ ನ್ಯಾಯಮೂರ್ತಿ ಡಿ.ಎನ್ ಪಟೇಲ್ ಮತ್ತು ನ್ಯಾಯಮೂರ್ತಿ ಜ್ಯೋತಿ ಸಿಂಗ್ ಅವರ ಪೀಠವು ಹೇಳಿದೆ.

‘ಅಮಿತಾಭ್‌ ಮತ್ತು ಅವರು ಕುಟುಂಬದ ಸದಸ್ಯರಿಗೆ ಕೋವಿಡ್‌ ತಗುಲಿತ್ತು. ಹಾಗಾಗಿ ಕಾಲರ್‌ ಟ್ಯೂನ್‌ನಿಂದ ಅವರ ಧ್ವನಿಯನ್ನು ತೆಗೆಯಬೇಕು’ ಎಂದು ಅರ್ಜಿಯಲ್ಲಿ ಹೇಳಲಾಗಿತ್ತು.