ದೆಹಲಿ ಮೆಟ್ರೊ ರೈಲು ಸೇವೆ: ಉಚಿತ ವೈಫೈಗೆ ಚಾಲನೆ

ನವದೆಹಲಿ: ದೆಹಲಿಯಲ್ಲಿ ಮೆಟ್ರೊ ರೈಲು ಪ್ರಯಾಣಿಕರು ಇನ್ನು ಉಚಿತವಾಗಿ ಇಂಟರ್‌ನೆಟ್‌ ಸೇವೆ ಪಡೆಯಬಹುದು. ಹೈಸ್ಪೀಡ್‌ ಸಾಮರ್ಥ್ಯದ ವೈ–ಫೈ ಉಚಿತ ಸೇವೆಗೆ ಮೆಟ್ರೊ ರೈಲು ಸೇವೆಯ ಹಳದಿ ಮಾರ್ಗದಲ್ಲಿ ಆರಂಭಿಸಲಾಗಿದೆ ಎಂದು ಡಿಎಂಆರ್‌ಸಿ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಹಿಂದೆ ಡಿಎಂಆರ್‌ಸಿಯು ಜನವರಿ 2020ರಲ್ಲಿ ನವದೆಹಲಿ ಮತ್ತು ದ್ವಾರ್ಕಾ ಸೆಕ್ಟರ್ ಸಂಪರ್ಕ ಕಲ್ಪಿಸುವ ಮಾರ್ಗದಲ್ಲಿ ಕೋಚ್‌ ಒಳಗಡೆ ವೈ–ಫೈ ಸೌಲಭ್ಯ ಕಲ್ಪಿಸಿತ್ತು. ಒಂದು ವರ್ಷದ ಅವಧಿಯಲ್ಲಿಯೇ ಹಳದಿ ಮಾರ್ಗದಲ್ಲಿಯೂ ಈ ಸೌಲಭ್ಯವನ್ನು ವಿಸ್ತರಿಸಲಾಗಿದೆ.

ದಕ್ಷಿಣ ಏಷಿಯಾ ವಲಯದಲ್ಲಿಯೇ ಯಾವುದೇ ದೇಶದಲ್ಲಿ ಇಂಥ ಸೌಲಭ್ಯ ಒದಗಿಸಿರುವ ಮೊದಲ ಮೆಟ್ರೊ ರೈಲು ಸೇವೆಯು ದೆಹಲಿಯದ್ದಾಗಿದೆ. 22.7 ಕಿ.ಮೀ. ಅಂತರದ ಈ ಮಾರ್ಗದಲ್ಲಿ ಒಟ್ಟು ಆರು ನಿಲ್ದಾಣಗಳು ಬರಲಿವೆ.