ಪಾಕ್‌ ರಾಯಭಾರ ಕಚೇರಿ ಅಧಿಕಾರಿಗೆ ದೇಶ ತೊರೆಯಲು ತಾಕೀತು

ನವದೆಹಲಿ: ಅಧಿಕೃತ ಕೆಲಸ ಹೊರತುಪಡಿಸಿದ ಚಟುವಟಿಕೆಗಳಲ್ಲಿ ತೊಡಗಿದ್ದ ಆರೋಪದ ಅಡಿ ಇಲ್ಲಿನ ಪಾಕಿಸ್ತಾನ ರಾಯಭಾರಿ ಕಚೇರಿ ಅಧಿಕಾರಿಯೊಬ್ಬರಿಗೆ ದೇಶ ತೊರೆಯಲು ಆದೇಶಿಸಲಾಗಿದೆ.

ಈ ಅಧಿಕಾರಿಗೆ ದೇಶವನ್ನು ತೊರೆಯಲು 24 ಗಂಟೆ ಸಮಯ ನೀಡಲಾಗಿದೆ. ರಾಯಭಾರ ಕಚೇರಿಗೂ ಮಾಹಿತಿ ನೀಡಲಾಗಿದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯವು ತಿಳಿಸಿದೆ. 

ರಾಯಭಾರ ಕಚೇರಿಯಲ್ಲಿ ಇರುವ ಯಾವುದೇ ರಾಜತಾಂತ್ರಿಕ ಅಥವಾ ಅಧಿಕಾರಿ ತನ್ನ ಕಾರ್ಯ ವ್ಯಾಪ್ತಿಯನ್ನು ಯಾವುದೇ ರೀತಿ ದುರ್ಬಳಕೆ ಮಾಡಿಕೊಳ್ಳಬಾರದು ಎಂದು ತಾಕೀತು ಮಾಡಲಾಗಿದೆ.

ಬೇಹುಗಾರಿಕೆಯಲ್ಲಿ ತೊಡಗಿದ್ದ ಆರೋಪದ ಮೇಲೆ ಮೇ 13ರಂದೂ ಅಧಿಕಾರಿಯೊಬ್ಬರನ್ನು ಗಡೀಪಾರು ಮಾಡಲಾಗಿತ್ತು.