ಜೆಇಇ ಮುಖ್ಯ ಪರೀಕ್ಷೆ ವೇಳಾಪಟ್ಟಿ ಪರಿಷ್ಕರಣೆ

ನವದೆಹಲಿ: ಐಐಟಿಗಳ ಪ್ರವೇಶಾತಿಗೆ ಅವಕಾಶ ಕಲ್ಪಿಸುವ 2022ನೇ ಸಾಲಿನ ಜೆಇಇ- ಮುಖ್ಯ ಪರೀಕ್ಷೆಯ ವೇಳಾಪಟ್ಟಿಯನ್ನು ರಾಷ್ಟ್ರೀಯ ಪರೀಕ್ಷಾ ಏಜೆನ್ಸಿ (ಎನ್‌ಟಿಎ) ಪರಿಷ್ಕರಣೆ ಮಾಡಿದೆ.

ಏಪ್ರಿಲ್‌ 16ರಿಂದ 21ರವರೆಗೆ ನಿಗದಿಯಾಗಿದ್ದ ಜೆಇಇ ಮುಖ್ಯ ಪರೀಕ್ಷೆ, ಪರಿಷ್ಕೃತ ವೇಳಾಪಟ್ಟಿ ಪ್ರಕಾರ ಏಪ್ರಿಲ್‌ 21ರಿಂದ 29ರವರೆಗೆ ಮತ್ತು ಮೇ 1ರಿಂದ ಮೇ 4ರವರೆಗೆ ನಡೆಯಲಿದೆ.

ಈ ಮುನ್ನ ಜೆಇಇ-ಮುಖ್ಯ ಪರೀಕ್ಷೆಗಳು 12ನೇ ತರಗತಿ ಪರೀಕ್ಷೆ ನಡೆಯುವ ದಿನದಂದೇ ನಿಗದಿಯಾಗಿದ್ದವು. ಇದರಿಂದ ತಾವು 12ನೇ ತರಗತಿ ಅಥವಾ ಜೆಇಇ ಪರೀಕ್ಷೆಗಳ ಪೈಕಿ ಒಂದನ್ನು ತಪ್ಪಿಸಿಕೊಳ್ಳಬೇಕಾಗುತ್ತದೆ ಎಂದು ಅವಲತ್ತುಕೊಂಡಿದ್ದ ಅಭ್ಯರ್ಥಿಗಳು, ಪರೀಕ್ಷಾ ದಿನಾಂಕದ ಬದಲಾವಣೆಗೆ ಕೋರಿದ್ದರು. ಅದರಂತೆ ಈಗ ಪರೀಕ್ಷಾ ವೇಳಾಪಟ್ಟಿಯನ್ನು ಪರಿಷ್ಕರಿಸಲಾಗಿದೆ.