ಮಹಾರಾಷ್ಟ್ರ: ಸಕ್ರಿಯವಾದ ಸಣ್ಣ ಪಕ್ಷಗಳು

ಮುಂಬೈ: ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯ ಮತಗಳ ಎಣಿಕೆಗೆ ಕ್ಷಣಗಣನೆ ಆರಂಭವಾಗಿದೆ. ಸಣ್ಣ ಪಕ್ಷಗಳು ಹೆಚ್ಚು ಸಕ್ರಿಯವಾಗಿವೆ. ದೊಡ್ಡ ಪಕ್ಷಗಳು, ಗೆಲ್ಲಬಹುದಾದ ಪ್ರಭಾವಿ ಪಕ್ಷೇತರರು ಮತ್ತು ಬಂಡಾಯ ಅಭ್ಯರ್ಥಿಗಳ ಸೆಳೆಯಲು ಕಸರತ್ತು ಆರಂಭಿಸಿವೆ.

ಶಾಸಕರಾಗಿ ಗೆದ್ದವರನ್ನು ಸೆಳೆಯುವ ಮತ್ತು ಖರೀದಿಸುವ ಯತ್ನಗಳನ್ನು ತಡೆಯುವ ಕ್ರಮವಾಗಿ ಚುನಾಯಿತ ಶಾಸಕರನ್ನು ಇರಿಸಲು ರಾಜಧಾನಿಯಲ್ಲಿನ ಪ್ರಮುಖ ರೆಸಾರ್ಟ್‌ಗಳು ಹಾಗೂ ಹೋಟೆಲ್‌ಗಳಲ್ಲಿ ಪ್ರಮುಖ ಪಕ್ಷಗಳು ಕೊಠಡಿಗಳನ್ನು ಕಾಯ್ದಿರಿಸಿವೆ.

288 ಸದಸ್ಯ ಬಲದ ಮಹಾರಾಷ್ಟ್ರ ವಿಧಾನಸಭೆಗೆ ಬುಧವಾರ (ನ.20) ಒಂದೇ ಹಂತದಲ್ಲಿ ಚುನಾವಣೆ ನಡೆದಿತ್ತು.

ಪ್ರಮುಖ ಮೈತ್ರಿಕೂಟಗಳಾದ ಬಿಜೆಪಿ ನೇತೃತ್ವದ ಮಹಾಯುತಿ ಮತ್ತು ಕಾಂಗ್ರೆಸ್ ನೇತೃತ್ವದ ಮಹಾವಿಕಾಸ ಅಘಾಡಿ (ಎಂವಿಎ) ಮೈತ್ರಿಕೂಟಗಳು, ಬಹುಜನ ವಿಕಾಸ ಅಘಾಡಿ (ಬಿವಿಎ) ಸ್ಥಾಪಕ ಹಿತೇಂದ್ರ ಠಾಕೂರ್ ಮತ್ತು ಪ್ರಹಾರ್ ಜನಶಕ್ತಿ ಪಕ್ಷದ ಬಚ್ಚುಕಡು ಅವರನ್ನು ಸಂಪರ್ಕಿಸಿವೆ. ಬಿವಿಎ 8 ಕ್ಷೇತ್ರಗಳಲ್ಲಿ, ಪ್ರಹಾರ್ ಜನಶಕ್ತಿ 38 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿದೆ.

ಕಡು ಅವರು ಕೊಲ್ಹಾಪುರ ರಾಜಮನೆತನದ ಯುವರಾಜ ಸಂಭಾಜಿ ಛತ್ರಪತಿ ಸ್ಥಾಪಿಸಿದ್ದ ಪರಿವರ್ತನ್‌ ಮಹಾಶಕ್ತಿ ಮೈತ್ರಿಕೂಟದ ಭಾಗವಾಗಿದ್ದಾರೆ. ಈ ಮೈತ್ರಿಯಲ್ಲಿ ಸಂಭಾಜಿ ಸ್ಥಾಪಿಸಿದ್ದ ಮಹಾರಾಷ್ಟ್ರ ಸ್ವರಾಜ್ಯಪಕ್ಷ ಮತ್ತು ರಾಜು ಶೆಟ್ಟಿ ಅವರ ಸ್ವಾಭಿಮಾನ ಪಕ್ಷ ಇವೆ.

ಪ್ರಸ್ತುತ ಅವಧಿಯನ್ನು ಪೂರೈಸುತ್ತಿರುವ ಹಾಲಿ ವಿಧಾನಸಭೆಯಲ್ಲಿ ಬಿವಿಎ ಪಕ್ಷದ ಮೂವರು ಮತ್ತು ಪ್ರಹಾರ್ ಜನಶಕ್ತಿ ಪಕ್ಷದ ಇಬ್ಬರು ಶಾಸಕರಿದ್ದಾರೆ.  

ಮತ್ತೊಂದು ಬೆಳವಣಿಗೆಯಲ್ಲಿ ಪ್ರಕಾಶ್‌ ಅಂಬೇಡ್ಕರ್ ಅವರ ವಂಚಿತ್ ಬಹುಜನ ಅಘಾಡಿ (ವಿಬಿಎ) ಪಕ್ಷವು, ‘ಅಗತ್ಯ ಸಂಖ್ಯೆಯ ಶಾಸಕರನ್ನು ಪಕ್ಷವು ಹೊಂದಿದಲ್ಲಿ, ರಾಜ್ಯದಲ್ಲಿ ಸರ್ಕಾರ ರಚಿಸುವ ಮೈತ್ರಿಕೂಟವನ್ನು ಬೆಂಬಲಿಸಲಾಗುವುದು’ ಎಂದು ಪ್ರಕಟಿಸಿದ್ದಾರೆ.

ವಿಧಾನಸಭೆ ಚುನಾವಣೆಯಲ್ಲಿ ವಿಬಿಎ ಒಟ್ಟು 200 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿದೆ.

ಮಹಾರಾಷ್ಟ್ರ ನವನಿರ್ಮಾಣ ಸೇನೆಯ ಸ್ಥಾಪಕ ರಾಜ್‌ ಠಾಕ್ರೆ ಅವರ ಆಪ್ತ, ಮಾಜಿ ಸಚಿವ ಬಾಳಾ ನಂದಗಾಂವಕರ್ ಅವರು ಶುಕ್ರವಾರ ಉಪಮುಖ್ಯಮಂತ್ರಿ ದೇವೇಂದ್ರ ಫಡಣವೀಸ್‌ ಅವರನ್ನು ಭೇಟಿಯಾಗಿ ಚರ್ಚಿಸಿದರು. ರಾಜಠಾಕ್ರೆ ಈ ಚುನಾವಣೆಯಲ್ಲಿ ಪಕ್ಷೇತರರಾಗಿ ಕಣಕ್ಕಿಳಿದಿದ್ದಾರೆ. ಲೋಕಸಭೆ ಚುನಾವಣೆಯಲ್ಲಿ ಪ್ರಧಾನಿ ಮೋದಿ ಅವರನ್ನು ಬೆಂಬಲಿಸಿದ್ದರು.