ಪಶ್ಚಿಮ ಬಂಗಾಳದಲ್ಲಿ ಅಲ್‌ಖೈದಾ ಉಗ್ರನ ಬಂಧನ

ಕೋಲ್ಕತ್ತ:ಪಾಕಿಸ್ತಾನ ಮೂಲದ ಅಲ್‌ಖೈದಾ ಚಟುವಟಿಕೆಗಳಲ್ಲಿ ಭಾಗಿಯಾದ ಆರೋಪದ ಮೇಲೆ ಪಶ್ಚಿಮ ಬಂಗಾಳದ ಮುರ್ಷಿದಾಬಾದ್‌ ಜಿಲ್ಲೆಯ ಜಲಂಗಿ ಎಂಬಲ್ಲಿ ಶಮೀಮ್‌ ಅನ್ಸಾರಿ ಎಂಬಾತನನ್ನು ಬಂಧಿಸಲಾಗಿದೆ ಎಂದು ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ಭಾನುವಾರ ತಿಳಿಸಿದೆ.

‘ಕೆಲ ದಿನಗಳ ಹಿಂದೆ ಬಂಧಿಸಿರುವ ಭಯೋತ್ಪಾದಕರೊಂದಿಗೆ ಶಮೀಮ್‌ ಶಾಮೀಲಾಗಿರುವುದು ಖಚಿತವಾದ ಹಿನ್ನೆಲೆಯಲ್ಲಿ ಬಂಧಿಸಲಾಗಿದೆ. ಅವರ ಮೊಬೈಲ್‌ ಅನ್ನು ಜಪ್ತಿ ಮಾಡಲಾಗಿದೆ. ಈ ಮೊದಲು ಶಮೀಮ್‌ ಕೇರಳಕ್ಕೂ ಭೇಟಿ ನೀಡಿರುವುದು ತನಿಖೆ ವೇಳೆ ತಿಳಿದು ಬಂದಿತ್ತು. ಈಗ ವಿಚಾರಣೆ ನಡೆಸಲಾಗುತ್ತಿದೆ’ ಎಂದು ಎನ್‌ಐಎ ಅಧಿಕಾರಿಗಳು ಹೇಳಿದ್ದಾರೆ.

ಅಲ್‌ಖೈದಾದೊಂದಿಗೆ ಸಂಬಂಧ ಹೊಂದಿದ್ದ ಆರೋಪದ ಮೇಲೆ ಪಶ್ಚಿಮ ಬಂಗಾಳದಿಂದ ಆರು ಹಾಗೂ ಕೇರಳದಿಂದ ಮೂವರನ್ನು ಕೆಲ ದಿನಗಳ ಹಿಂದೆ ಎನ್‌ಐಎ ಬಂಧಿಸಿದೆ.