ಹೊಸ ಎನ್‌ಪಿಆರ್ ಬಗ್ಗೆ ಪ್ರಶ್ನಿಸಿದ ನಿತೀಶ್

ಪಟ್ನಾ (ಬಿಹಾರ): ಕೇಂದ್ರ ಸರ್ಕಾರದಹೊಸ ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ (ಎನ್‌ಪಿಆರ್‌) ನಮೂನೆ ಕುರಿತು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಪ್ರಶ್ನಿಸಿರುವ ಬಿಹಾರದ ಮುಖ್ಯಮಂತ್ರಿ ನಿತೀಶ್ ಕುಮಾರ್, ಹೊಸ ಎನ್‌ಪಿಆರ್ ಬದಲಿಗೆ ಹಳೇ ಎನ್‌ಪಿಆರ್ ಅನ್ನು ಬಳಸುವಂತೆ ಕೋರಿದ್ದಾರೆ.

‘ಹೊಸ ಎನ್‌ಪಿಆರ್ ನಮೂನೆ ಹೆಚ್ಚು ಆತಂಕ ಮತ್ತು ಭಯವನ್ನು ಸೃಷ್ಟಿಸುತ್ತಿದೆ. ಪೋಷಕರ ಸ್ಥಳ, ಹುಟ್ಟಿದ ದಿನಾಂಕದಂಥ ಅನೇಕ ಕಾಲಂಗಳು ಅದರಲ್ಲಿವೆ. ಇದು ಅನಗತ್ಯ. ನೀವೇನಾದರೂ ನನ್ನನ್ನು ಕೇಳಿದರೆ, ನನಗೆ ನನ್ನ ತಾಯಿ ಹುಟ್ಟಿದ ದಿನಾಂಕವೂ ಗೊತ್ತಿಲ್ಲ. ಈ ಕಾಲಂಗಳು ಐಚ್ಛಿಕವಾಗಿರಬೇಕು. ಇದನ್ನು ಬೇಕಾದರೆ ಖಾಲಿ ಬಿಡಬಹುದು. ಆದರೆ, ಈ ರೀತಿ ಕಾಲಂ ಖಾಲಿ ಬಿಡುವುದರಿಂದ ಹೆಚ್ಚಿನ ಆತಂಕ, ಅನುಮಾನ ಮೂಡುತ್ತವೆ. ಅದಕ್ಕಾಗಿ ಹೊಸ ನಮೂನೆಯ ಬದಲಿಗೆ ಹಳೆ ಎನ್‌ಪಿಆರ್ ನಮೂನೆಯನ್ನೇ (2010–11) ಬಳಸಬೇಕೆಂದು ನಾನು ಕೇಂದ್ರಕ್ಕೆ ಮನವಿ ಮಾಡುತ್ತೇನೆ’ ಎಂದು ನಿತೀಶ್ ಹೇಳಿದ್ದಾರೆ.

ಬಿಹಾರದಲ್ಲಿ ಎನ್‌ಆರ್‌ಸಿ ಅನುಷ್ಠಾನಗೊಳಿಸುವ ಪ್ರಶ್ನೆಯೇ ಇಲ್ಲ ಎಂದು ಪುನರುಚ್ಚರಿಸಿರುವ ನಿತೀಶ್, ಲೋಕಸಭೆ ಮತ್ತು ರಾಜ್ಯಸಭೆಯ ಜೆಡಿಯು ಸಂಸದರು ಎನ್‌ಪಿಆರ್ ಸಮಸ್ಯೆ ಕುರಿತು ಮೋದಿ ಸರ್ಕಾರದ ಗಮನ ಸೆಳೆಯಲಿದ್ದಾರೆ’ ಎಂದರು.