ಟ್ರಿನಿಡಾಡ್‌–ಟೊಬಾಗೋ ಜೊತೆ ಬಿಹಾರದ ನಂಟು ಕುರಿತು ಪ್ರಶಂಸಿಸಿದ ಪ್ರಧಾನಿ ಮೋದಿ

ಪೋರ್ಟ್‌ ಆಫ್‌ ಸ್ಪೇನ್‌: ‘ಟ್ರಿನಿಡಾಡ್‌–ಟೊಬಾಗೋ ದೇಶದ ಜೊತೆ ಬಿಹಾರದ ನಂಟಿನ ಕುರಿತು ಪ್ರಶಂಸಿಸಿದ ಪ್ರಧಾನಿ ನರೇಂದ್ರ ಮೋದಿ, ಬಿಹಾರದ ಪರಂಪರೆಯು ಭಾರತ ಹಾಗೂ ಇಡೀ ವಿಶ್ವದ ಹೆಮ್ಮೆಯಾಗಿದೆ’ ಎಂದು ತಿಳಿಸಿದರು.

ಕೊವ್ವಾದ ರಾಷ್ಟ್ರೀಯ ಸೈಕ್ಲಿಂಗ್‌ ಕ್ರೀಡಾಂಗಣದಲ್ಲಿ ಶುಕ್ರವಾರ ಭಾರತೀಯ ಸಮುದಾಯವನ್ನು ಉದ್ದೇಶಿಸಿ ಮಾತನಾಡಿದ ಅವರು, ‘ಇಲ್ಲಿ ಭಾಗಿಯಾಗಿರುವ ಹಲವರ ಪೂರ್ವಜರು ಬಿಹಾರದಿಂದಲೇ ಬಂದಿದ್ದಾರೆ. ಬಿಹಾರದ ಪರಂಪರೆಯು ಇಡೀ ದೇಶ ಮಾತ್ರವಲ್ಲದೇ, ವಿಶ್ವಕ್ಕೇ ಹೆಮ್ಮೆಯಾಗಿದೆ’ ಎಂದರು.

‘ಟ್ರಿನಿಡಾಡ್‌–ಟೊಬಾಗೋದ ಪ್ರಧಾನಿ ಕಮಲಾ ಪೆಸ್ರಾದ್‌ ಬಿಸ್ಸೆಸ್ಸರ್‌ ಅವರ ಪೂರ್ವಜರು ಬಿಹಾರದವರೇ ಆಗಿದ್ದು, ಅವರನ್ನು ಇಡೀ ಭಾರತವೇ ‘ಬಿಹಾರದ ಮಗಳು’ ಎಂದು ಹೇಳಲು ಹೆಮ್ಮೆಪಡುತ್ತದೆ’ ಎಂದು ನೆನಪಿಸಿಕೊಂಡರು.

‘ಎರಡು ರಾಷ್ಟ್ರಗಳ ನಡುವೆ ಸಾಂಸ್ಕೃತಿಕ ಸಂಬಂಧ ಹಾಗೂ ಬಿಹಾರದ ಪ್ರಮುಖ ಭಾಷೆಯಾದ ಭೋಜ್‌ಪುರಿ ಭಾಷೆಯನ್ನು ಕೆರೆಬಿಯನ್‌ ದೇಶದಲ್ಲಿ ನೆಲಸಿರುವ ಭಾರತೀಯ ಸಮುದಾಯವರು ಹೆಚ್ಚಾಗಿ ಬಳಸುತ್ತಾರೆ’ ಎಂದು ಪ್ರಧಾನಿ ಮೋದಿ ‘ಎಕ್ಸ್’ನಲ್ಲಿ ಪೋಸ್ಟ್ ಮಾಡಿದ್ದಾರೆ.

‘ಪ್ರಜಾಪ್ರಭುತ್ವ ಇರಲಿ, ರಾಜಕೀಯ, ರಾಜತಾಂತ್ರಿಕತೆ, ಉನ್ನತ ಶಿಕ್ಷಣದ ವಿಚಾರವೇ ಇರಲಿ; ಬಿಹಾರವು ಶತಮಾನಗಳ ಹಿಂದೆಯೇ ಇಡೀ ವಿಶ್ವಕ್ಕೆ ಹೊಸ ದಿಕ್ಕು ನೀಡಿತ್ತು. ಹೊಸ ಸ್ಫೂರ್ತಿಗಳು ಹಾಗೂ ಹೊಸ ಅವಕಾಶಗಳು 21ನೇ ಶತಮಾನದಲ್ಲಿಯೇ ಬಿಹಾರದಲ್ಲಿ ಸೃಷ್ಟಿಯಾಗುತ್ತಿವೆ’ ಎಂದು ವಿವರಿಸಿದ್ದಾರೆ.

‘ಗಿರ್‌ಮಿಟಿಯಾ ಸಮುದಾಯಗಳ ಸಮಗ್ರ ದತ್ತಾಂಶಗಳ ಸಂಗ್ರಹ ನಿಟ್ಟಿನಲ್ಲಿ ಭಾರತವು ಸಕ್ರಿಯವಾಗಿ ಕೆಲಸ ಮಾಡುತ್ತಿದ್ದು, ಇದರಿಂದ ಟ್ರಿನಿಡಾಡ್– ಟೊಬಾಗೋ ದೇಶದ ಸಹೋದರ– ಸಹೋದರಿಯರ ಜೊತೆಗೆ ಭಾರತದ ಐತಿಹಾಸಿಕ ಸಂಬಂಧವನ್ನು ಮುಂದುವರಿಸಲು ನೆರವಾಗಲಿದೆ’ ಎಂದು ಪ್ರಧಾನಿ ಮೋದಿ ಹೇಳಿದ್ದಾರೆ. 

ಬ್ರಿಟಿಷ್‌ ಆಡಳಿತದ ಅವಧಿಯಲ್ಲಿ ಉತ್ತರ ಪ್ರದೇಶ, ಬಿಹಾರದಿಂದ ನೂರಾರು ಕಾರ್ಮಿಕರು ಆಫ್ರಿಕಾ ರಾಷ್ಟ್ರಗಳಾದ ದಕ್ಷಿಣ ಆಫ್ರಿಕಾ, ಫಿಜಿ, ಮಾರಿಷಸ್ ಹಾಗೂ ಕೆರಿಬಿಯನ್‌ ದೇಶಗಳ ತೋಟಗಳಲ್ಲಿ ಕೆಲಸ ಮಾಡಲು ಹೋಗಿ ಅಲ್ಲಿಯೇ ನೆಲಸಿದ್ದರು.

ಆಕಾಶದಷ್ಟು ಅವಕಾಶ: ‘ಭಾರತವು ಶೀಘ್ರದಲ್ಲಿ ವಿಶ್ವದ ಮೂರು ಪ್ರಮುಖ ಆರ್ಥಿಕ ರಾಷ್ಟ್ರಗಳಲ್ಲಿ ಒಂದಾಗಲಿದೆ. ಕೃತಕ ಬುದ್ಧಿಮತ್ತೆ, ಸೆಮಿಕಂಡಕ್ಟರ್‌, ಕ್ವಾಟಂ ಎಂಜಿನಿಯರ್‌ ಕ್ಷೇತ್ರವು ದೇಶದ ಅಭಿವೃದ್ಧಿಯ ಪ್ರಮುಖ ಎಂಜಿನ್‌ ಆಗಿರಲಿದೆ’ ಎಂದು ಪ್ರಧಾನಿ ಮೋದಿ ತಿಳಿಸಿದರು.

ಭಾರತವು ಹಲವು ಅವಕಾಶಗಳ ತಾಣವಾಗಿದ್ದು, ಅಭಿವೃದ್ಧಿಯ ಫಲವು ಅಗತ್ಯವಿರುವವರಿಗೂ ತಲುಪುತ್ತಿದೆ. ಹೊಸ ಭಾರತಲ್ಲಿ ಅವಕಾಶ ಆಕಾಶದಷ್ಟಿದೆ’ ಎಂದು ತಿಳಿಸಿದರು.

ಐದು ರಾಷ್ಟ್ರಗಳ ಪ್ರವಾಸ ಕೈಗೊಂಡಿರುವ ಪ್ರಧಾನಿ ಮೋದಿ, ಪ್ರವಾಸದ ಎರಡನೇ ರಾಷ್ಟ್ರದ ಭೇಟಿಯಾಗಿ ಇಲ್ಲಿಗೆ ಬಂದಿಳಿದ್ದಾರೆ. 1999ರ ಬಳಿಕ ಕೆರೆಬಿಯನ್‌ ದ್ವೀಪರಾಷ್ಟ್ರಕ್ಕೆ ಭೇಟಿ ನೀಡಿದ ಮೊದಲ ಭಾರತೀಯ ಪ್ರಧಾನಿಯಾಗಿದ್ದಾರೆ.