ಕಾಂಗ್ರೆಸ್‌ ಅನ್ನು ಬಿಹಾರ ತಿರಸ್ಕರಿಸಿದೆ: ಪ್ರಧಾನಿ

ಸೂರತ್‌: ‘ಮುಸ್ಲಿಂ ಲೀಗ್‌– ಮಾವೋವಾದಿ ಸಂಯೋಜನೆಯಾಗಿ ಮಾರ್ಪಟ್ಟಿರುವ ಕಾಂಗ್ರೆಸ್‌ ಪಕ್ಷವನ್ನು ಮತ್ತು ಜಾತೀಯತೆಯ ವಿಷ ಬಿತ್ತುವ ವಿರೋಧ ಪಕ್ಷವನ್ನು ಬಿಹಾರದ ಜನರು ತಿರಸ್ಕರಿಸಿದ್ದಾರೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ಶನಿವಾರ ಹೇಳಿದರು. 

ಗುಜರಾತಿನ ಸೂರತ್‌ನಲ್ಲಿ ವಿವಿಧ ಅಭಿವೃದ್ಧಿ ಕಾರ್ಯಗಳಿಗೆ ಚಾಲನೆ ನೀಡಿ ಮಾತನಾಡಿದ ಅವರು, ‘ಬಿಹಾರದಲ್ಲಿ ಎನ್‌ಡಿಎ ಪ್ರಚಂಡ ವಿಜಯಕ್ಕೆ ಮಹಿಳೆಯರು ಮತ್ತು ಯುವ ಸಮುದಾಯ ಕಾರಣ’ ಎಂದರು. 

ದಲಿತ ಸಮುದಾಯ ಪ್ರಬಲವಾಗಿರುವ ಬಿಹಾರದ 38 ಕ್ಷೇತ್ರಗಳಲ್ಲಿ ಎನ್‌ಡಿಎ ಅಭ್ಯರ್ಥಿಗಳು 34 ಕಡೆ ಗೆದ್ದಿದ್ದಾರೆ. ಇದು ದಲಿತ ಸಮುದಾಯದವರೂ ವಿರೋಧ ಪಕ್ಷವನ್ನು ತಿರಸ್ಕರಿಸಿರುವುದನ್ನು ತೋರಿಸುತ್ತದೆ ಎಂದರು.