ವೈದ್ಯ ಕಾಲೇಜುಗಳಲ್ಲಿ ಖಾಸಗಿ ವೈದ್ಯರಿಗೂ ಬೋಧನೆಗೆ ಅವಕಾಶ

ನವದೆಹಲಿ: ವೈದ್ಯಕೀಯ ಕಾಲೇಜುಗಳು ಇನ್ನು ಮುಂದೆ ಖಾಸಗಿ ವೈದ್ಯರನ್ನು ಅರೆಕಾಲಿಕ ಆಧಾರದ ಮೇಲೆ ನೇಮಕ ಮಾಡಿಕೊಂಡು ಎಂಬಿಬಿಎಸ್ ಮತ್ತು ಸ್ನಾತಕೋತ್ತರ ವಿದ್ಯಾರ್ಥಿಗಳಿಗೆ ಬೋಧಿಸಲು ನಿಯೋಜಿಸಬಹುದು. ಅನಿವಾಸಿ ಭಾರತೀಯರಿಗೂ ಬೋಧನೆಗೆ ಅವಕಾಶ ನೀಡಬಹುದು ಎಂದು ಸರ್ಕಾರದ ಸುತ್ತೋಲೆ ತಿಳಿಸಿದೆ.

ಈ ಹೊಸ ನಿಯಮ ಏಮ್ಸ್‌ ಸಂಸ್ಥೆಗಳು, ಪಿಜಿಐ ಚಂಡೀಗಡ ಮತ್ತು ಪುದುಚೇರಿಯಲ್ಲಿನ ಜವಾಹರಲಾಲ್‌ ನೆಹರು ಸ್ನಾತಕೋತ್ತರ ಮತ್ತು ವೈದ್ಯಕೀಯ ಹಾಗೂ ಸಂಶೋಧನಾ ಸಂಸ್ಥೆಗೆ ಅನ್ವಯವಾಗುವುದಿಲ್ಲ.

ಈ ನಿರ್ಧಾರವನ್ನು ಬೋರ್ಡ್‌ ಆಫ್ ಡೈರೆಕ್ಟರ್ಸ್‌ (ಬಿಒಜಿ) ಕೈಗೊಂಡಿದೆ. ವೈದ್ಯಕೀಯ ಶಿಕ್ಷಣ ನಿಯಂತ್ರಿಸುವ ಭಾರತೀಯ ವೈದ್ಯಕೀಯ ಮಂಡಳಿ (ಎಂಸಿಐ) ಅಧಿಕಾರವನ್ನು ಬಿಒಜಿಗೆ ನೀಡಲಾಗಿದೆ. ಖಾಸಗಿ ಮತ್ತು ಸರ್ಕಾರಿ ವೈದ್ಯಕೀಯ ಕಾಲೇಜುಗಳಲ್ಲಿನ ಬೋಧಕ ಸಿಬ್ಬಂದಿ ಕೊರತೆ ಸಮಸ್ಯೆ ನಿವಾರಣೆ ಬಗ್ಗೆ ಬಿಒಜಿ ನೋಡಿಕೊಳ್ಳುತ್ತದೆ.