ಎಂಸಿಡಿ ಉಪಚುನಾವಣೆಯ ಮುನ್ನಾದಿನ ಬಿಜೆಪಿಗೆ ಸೇರಿದ ಕರ್ನಾಟಕದ ಎಎಪಿ ಉಸ್ತುವಾರಿ!

ನವದೆಹಲಿ: ದೆಹಲಿಯ ಮುನ್ಸಿಪಲ್ ಕಾರ್ಪೊರೇಷನ್‌ನ(ಎಂಸಿಡಿ) 12 ವಾರ್ಡ್‌ಗಳ ಉಪಚುನಾವಣೆಯ ಮುನ್ನಾದಿನ ಆಮ್ ಆದ್ಮಿ ಪಕ್ಷಕ್ಕೆ ಹಿನ್ನಡೆಯಾಗಿದ್ದು, ಪಕ್ಷದ ಹಿರಿಯ ನಾಯಕ ಮತ್ತು ಮಾಜಿ ಶಾಸಕ ರಾಜೇಶ್ ಗುಪ್ತಾ ಶನಿವಾರ ಇಲ್ಲಿ ಬಿಜೆಪಿಗೆ ಸೇರ್ಪಡೆಗೊಂಡಿದ್ದಾರೆ.

ಈ ಬೆಳವಣಿಗೆಯ ಬಗ್ಗೆ ಎಎಪಿಯಿಂದ ಸದ್ಯಕ್ಕೆ ಯಾವುದೇ ಪ್ರತಿಕ್ರಿಯೆ ಸಿಕ್ಕಿಲ್ಲ.

ರಾಷ್ಟ್ರೀಯ ವಕ್ತಾರ ಮತ್ತು ಎಎಪಿಯ ಕರ್ನಾಟಕ ಘಟಕದ ಉಸ್ತುವಾರಿಯೂ ಆಗಿದ್ದ ಗುಪ್ತಾ, ದೆಹಲಿ ಬಿಜೆಪಿ ಘಟಕದ ಅಧ್ಯಕ್ಷ ವೀರೇಂದ್ರ ಸಚದೇವ ಅವರ ಸಮ್ಮುಖದಲ್ಲಿ ಬಿಜೆಪಿ ಸೇರಿದರು.

ಸಚದೇವ ಅವರು ಗುಪ್ತಾ ಅವರನ್ನು ಪಕ್ಷದ ಶಾಲು ನೀಡುವ ಮೂಲಕ ಬಿಜೆಪಿಗೆ ಸ್ವಾಗತಿಸಿದರು ಎಂದು ದೆಹಲಿ ಬಿಜೆಪಿ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ತಿಳಿಸಿದೆ.

ದೆಹಲಿಯಲ್ಲಿನ 12 ವರ್ಷಗಳ ತಮ್ಮ ಪಕ್ಷದ ಆಳ್ವಿಕೆಯಲ್ಲಿ ಸೃಷ್ಟಿಯಾದ ನ್ಯೂನತೆಗಳು ಮತ್ತು ಸಮಸ್ಯೆಗಳನ್ನು ಎಎಪಿ ನಾಯಕರು ಈಗ ಪಟ್ಟಿ ಮಾಡುತ್ತಿದ್ದಾರೆ. ಎಂಟು ತಿಂಗಳ ಬಿಜೆಪಿ ಸರ್ಕಾರವನ್ನು ಪ್ರಶ್ನಿಸುತ್ತಿದ್ದಾರೆ ಎಂದು ದೆಹಲಿ ಬಿಜೆಪಿ ಅಧ್ಯಕ್ಷರು ಹೇಳಿದ್ದಾರೆ.

ಕಾರ್ಯಕರ್ತರನ್ನು ಬಳಸಿ ಬಿಸಾಡುವ ರೀತಿಯಲ್ಲಿ ನಡೆಸಿಕೊಂಡಿದ್ದೇ ಎಎಪಿ ಮತ್ತು ಅದರ ವರಿಷ್ಠ ಅರವಿಂದ ಕೇಜ್ರಿವಾಲ್ ಪತನಕ್ಕೆ ಕಾರಣವಾಗಿದೆ ಎಂದು ಕುಟುಕಿದ್ದಾರೆ.

ಬಿಜೆಪಿಗೆ ಸೇರುವ ಮುನ್ನ ರಾಜೇಶ್ ಗುಪ್ತಾ ಅವರು, ಎಎಪಿಗೆ ನೀಡಿದ ಕೊಡುಗೆಗಳು, ಅದಕ್ಕೆ ಪ್ರತಿಯಾಗಿ ಪಡೆದ ಅಪಹಾಸ್ಯ ಮತ್ತು ಎಎಪಿ ನಾಯಕ ಅರವಿಂದ್ ಕೇಜ್ರಿವಾಲ್ ಅವರ ನಡವಳಿಕೆಯನ್ನು ನೆನಪಿಸಿಕೊಳ್ಳುತ್ತಾ ಭಾವುಕರಾಗಿ ಕಣ್ಣೀರು ಹಾಕಿದರು ಎಂದು ಪ್ರಕಟಣೆ ತಿಳಿಸಿದೆ.

ಎಎಪಿ ಸ್ಥಾಪನೆಯಾದಾಗ, ಅನೇಕ ಪ್ರಮುಖ ವ್ಯಕ್ತಿಗಳು ಉತ್ಸಾಹದಿಂದ ಅರವಿಂದ ಕೇಜ್ರಿವಾಲ್ ಅವರೊಂದಿಗೆ ಕೈಜೋಡಿಸಿದ್ದರು. ಆದರೆ, ಅವರು ಎಲ್ಲರಿಗೂ ದ್ರೋಹ ಬಗೆದರು, ಒಬ್ಬೊಬ್ಬರಾಗಿ ಅವರೆಲ್ಲರ ಕೈಬಿಟ್ಟರು. ದುರಾದೃಷ್ಟವಶಾತ್, ಇಂದು ನಾನು ಕೂಡ ಆ ಪಟ್ಟಿಗೆ ಸೇರಿದ್ದೇನೆ ಎಂದು ಗುಪ್ತಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.