ಬಂಗಾಳ ಚುನಾವಣೆ| ನಂದಿಗ್ರಾಮದಲ್ಲಿ ಅಮಿತ್‌ ಶಾ ರೋಡ್‌ ಶೋ, ಜೈ ಶ್ರೀರಾಮ್‌ ಘೋಷಣೆ

ನಂದಿಗ್ರಾಮ: ವಿಧಾನಸಭಾ ಚುನಾವಣೆಯ ಎರಡನೇ ಹಂತದ ಮತದಾನಕ್ಕೆ ಎರಡು ದಿನಗಳ ಬಾಕಿ ಇರುವಂತೆ, ಪಶ್ಚಿಮ ಬಂಗಾಳದಲ್ಲಿ ಚುನಾವಣಾ ಪ್ರಚಾರ ರಂಗೇರುತ್ತಿದ್ದು, ಜಿದ್ದಾ ಜಿದ್ದಿ ಕ್ಷೇತ್ರವಾಗಿರುವ ನಂದಿಗ್ರಾಮದಲ್ಲಿ ಮಂಗಳವಾರ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಬೃಹತ್‌ ರೋಡ್‌ ಶೋ ನಡೆಸಿದರು.

ಬಿಜೆಪಿ ಧ್ವಜಗಳು ಹಾಗೂ ವಿವಿಧ ಪುಷ್ಪಗಳಿಂದ ಅಲಂಕರಿಸಿದ್ದ ಲಾರಿಯ ಮೇಲೆ ನಿಂತು, ಕ್ಷೇತ್ರದ ಅಭ್ಯರ್ಥಿ ಸುವೇಂದು ಅಧಿಕಾರಿಯೊಂದಿಗೆ ಚುನಾವಣಾ ಪ್ರಚಾರ ನಡೆಸಿದರು. ಮಿಡ್ನಾಪುರ ವಿಧಾನಸಭಾ ಕ್ಷೇತ್ರದ ಬೆಥೂರಿಯಾ ಮತ್ತು ರಾಯಪುರ ಗ್ರಾಮಗಳ ನಡುವೆ ನಾಲ್ಕು ಕಿ.ಮೀ ರೋಡ್‌ ಶೋ ನಡೆಸಿದರು.

ಸ್ಥಳೀಯ ನಾಗರಿಕರು ರಸ್ತೆಯ ಇಕ್ಕಲೆಗಳಲ್ಲಿ ನಿಂತು ಮೆರವಣಿಗೆ ವೀಕ್ಷಿಸಿದರು. ಅದರಲ್ಲಿ ಕೆಲವರು ‘ಜೈ ಶ್ರೀರಾಮ್‌‘, ‘ನರೇಂದ್ರ ಮೋದಿ ಜಿಂದಾಬಾದ್‌‘, ಅಮಿತ್‌ ಶಾ ಜಿಂದಾಬಾದ್‌ ಎಂದು ಘೋಷಣೆ ಕೂಗುತ್ತಿದ್ದರು. ಹಲವರು ವೀಡಿಯೊಗಳಲ್ಲಿ ರೋಡ್ ಶೊ ಸೆರೆ ಹಿಡಿದರೆ, ಕೆಲವರು ಸೆಲ್ಫಿಗಳನ್ನು ಕ್ಲಿಕ್ಕಿಸುತ್ತಿದ್ದರು.

ನಂದಿಗ್ರಾಮದಲ್ಲಿ ಟಿಎಂಸಿ ಪಕ್ಷದಿಂದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಸ್ಪರ್ಧಿಸಿದ್ದರೆ, ಅವರಿಗೆ ಪ್ರತಿಸ್ಪರ್ಧಿಯಾಗಿ ಟಿಎಂಸಿಯಿಂದ ವಲಸೆ ಬಂದಿರುವ ಸುವೇಂದು ಅಧಿಕಾರಿ ಬಿಜೆಪಿಯಿಂದ ಕಣಕ್ಕಿಳಿದಿದ್ದಾರೆ. ಈ ಕ್ಷೇತ್ರದಲ್ಲಿ ಏಪ್ರಿಲ್ 1 ರಂದು ಮತದಾನ ನಡೆಯಲಿದೆ.