ಭಾರತ್‌ ಜೋಡೊ ಉಪ ಯಾತ್ರೆಗೆ ಚಾಲನೆ

ನವದೆಹಲಿ : ಕಾಂಗ್ರೆಸ್‌ ಪಕ್ಷ ಹಮ್ಮಿಕೊಂಡಿರುವ ಭಾರತ್‌ ಜೋಡೊ ಉಪ ಯಾತ್ರೆಗೆ ಭುವನೇಶ್ವರದಲ್ಲಿ ಸೋಮವಾರ ಚಾಲನೆ ನೀಡಲಾಗಿದೆ. ಅಸ್ಸಾಂನಲ್ಲಿ ಆಯೋಜಿಸಲಾಗಿರುವ ಇದೇ ಮಾದರಿಯ ಮತ್ತೊಂದು ಯಾತ್ರೆಗೆ ಮಂಗಳವಾರ (ನ.1) ಹಸಿರು ನಿಶಾನೆ ದೊರೆಯಲಿದೆ.

ಪಕ್ಷದ ನಾಯಕ ರಾಹುಲ್‌ ಗಾಂಧಿ ಅವರು ಕನ್ಯಾಕುಮಾರಿಯಿಂದ ಕಾಶ್ಮೀರದವರೆಗೆ (ಒಟ್ಟು 3,570 ಕಿ.ಮೀ) ಯಾತ್ರೆ ಹಮ್ಮಿಕೊಂಡಿದ್ದಾರೆ. ಈ ಯಾತ್ರೆ ಹಾದು ಹೋಗದೆ ಇರುವ ರಾಜ್ಯಗಳಲ್ಲಿ ಇದೇ ಮಾದರಿಯ ಉಪ ಯಾತ್ರೆಗಳನ್ನು ಹಮ್ಮಿಕೊಳ್ಳಲು ಕಾಂಗ್ರೆಸ್‌ ನಿರ್ಧರಿಸಿದೆ.

‘ಒಡಿಶಾದಲ್ಲಿ ಹಮ್ಮಿಕೊಳ್ಳಲಾಗಿರುವ ಯಾತ್ರೆಗೆ ಮಾಜಿ ಪ್ರಧಾನಿ ಇಂದಿರಾ ಗಾಂಧಿಯವರ ಪುಣ್ಯ ಸ್ಮರಣೆಯ ದಿನ (ಅ.31) ಚಾಲನೆ ನೀಡಲಾಗಿದೆ. ರಾಜ್ಯದ 24 ಜಿಲ್ಲೆಗಳಲ್ಲಿ ಈ ಯಾತ್ರೆ ಸಂಚರಿಸಲಿದ್ದು ಒಟ್ಟು 2,250 ಕಿ.ಮೀ. ಕ್ರಮಿಸಲಿದೆ. ಭುವನೇಶ್ವರದಲ್ಲೇ ಇದು ಕೊನೆಗೊಳ್ಳಲಿದೆ. ಅಸ್ಸಾಂನಲ್ಲಿ ನಿಗದಿಯಾಗಿರುವ ಯಾತ್ರೆಯು (830 ಕಿ.ಮೀ) ಗೋಲೊಕ್‌ಗಂಜ್‌ನಲ್ಲಿ ಆರಂಭವಾಗಲಿದೆ’ ಎಂದು ಪಕ್ಷದ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ (ಸಂಘಟನೆ) ಜೈರಾಮ್‌ ರಮೇಶ್‌ ಹೇಳಿದ್ದಾರೆ.