ಜಗತ್ತಿನ ಪ್ರಭಾವಿ ಮಹಿಳೆಯರ ಪಟ್ಟಿಯಲ್ಲಿ ಸಾಲುಮರದ ತಿಮ್ಮಕ್ಕ

 

ಬಿಬಿಸಿ ಪ್ರಕಟಿಸಿದ 2016ನೇ ಸಾಲಿನ ಪ್ರಭಾವಿ ಮಹಿಳೆಯರ ಪಟ್ಟಿಯಲ್ಲಿ ತಿಮ್ಮಕ್ಕ ಸೇರಿದಂತೆ ಭಾರತದ ಐವರು ಸ್ಥಾನ ಪಡೆದಿದ್ದಾರೆ.   

 

ಬಾಲಿವುಡ್‌ ನಟಿ ಸನ್ನಿ ಲಿಯೋನ್‌, ಮಹಾರಾಷ್ಟ್ರದ ಸಾಂಗ್ಲಿಯ 20ರ ಹರೆಯದ ಕಂಪ್ಯೂಟರ್‌ ಎಂಜಿನಿಯರಿಂಗ್‌ ವಿದ್ಯಾರ್ಥಿನಿ ಗೌರಿ ಚಿಂದಾರ್ಕರ್‌, ಟ್ರ್ಯಾಕ್ಟರ್ಸ್‌ ಆ್ಯಂಡ್‌ ಫಾರ್ಮ್‌ ಇಕ್ವಿಪ್‌ಮೆಂಟ್‌ ಲಿಮಿಟೆಡ್‌ನ ಸಿಇಒ ಮಲ್ಲಿಕಾ  ಶ್ರೀನಿವಾಸನ್‌ ಹಾಗೂ ಬರಹಗಾರ್ತಿಯಾಗಿ ಹೆಸರು ಮಾಡಿರುವ ಮುಂಬೈನ ಚಿತ್ರನಟಿ ನೇಹಾ ಸಿಂಗ್‌ ಅವರ ಹೆಸರು ಪಟ್ಟಿಯಲ್ಲಿದೆ. 

 

ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಮಾಗಡಿ ತಾಲ್ಲೂಕಿನ ಹುಲಿಕಲ್‌ನ ತಿಮ್ಮಕ್ಕ  80 ವರ್ಷಗಳಲ್ಲಿ 8 ಸಾವಿರ ಮರಗಳನ್ನು ನೆಟ್ಟು ಬೆಳೆಸಿದ್ದಾರೆ ಎಂದು ಬಿಬಿಸಿ ಹೇಳಿದೆ. 

 

‘ಸ್ಕೂಲ್‌ ಇನ್‌ ದಿ ಕ್ಲೌಡ್‌’ ಎಂಬ ಸ್ವಯಂ ಶಿಕ್ಷಣ ಕಲಿಕಾ ಪದ್ಧತಿ ಮೂಲಕ ಕಲಿತು ಸಾಧನೆ ಮಾಡಿದ್ದಕ್ಕೆ ಗೌರಿ ಚಿಂದಾರ್ಕರ್‌ ಅವರು ಈ ಗೌರವಕ್ಕೆ ಪಾತ್ರರಾಗಿದ್ದಾರೆ. 

 

‘ಟ್ರ್ಯಾಕ್ಟರ್‌ ಕ್ವೀನ್‌’ ಎಂದೇ ಹೆಸರು ಪಡೆದಿರುವ ಚೆನ್ನೈ ಮೂಲದ ಮಲ್ಲಿಕಾ ತಮ್ಮ ಕುಟುಂಬದ ಕಂಪೆನಿಯನ್ನು ಜಗತ್ತಿನ ಮೂರನೇ ಅತಿದೊಡ್ಡ ಟ್ರ್ಯಾಕ್ಟರ್‌ ತಯಾರಿಕಾ ಕಂಪೆನಿಯಾಗಿ ಬೆಳೆಸಿದ್ದಾರೆ ಎಂದು ಬಿಬಿಸಿ ಹೇಳಿದೆ.