...ಪಶ್ಚಾತ್ತಾಪದ ಕಾಲ ದೂರವಿಲ್ಲ

ಬೆಂಗಳೂರು: `ನನ್ನನ್ನು ಜೈಲಿಗೆ ಕಳುಹಿಸಿ ಸಂತೋಷಪಟ್ಟವರು ಪಶ್ಚಾತ್ತಾಪ ಪಡುವ ಕಾಲ ದೂರ ಇಲ್ಲ~-
ಹೀಗೆ ಹೇಳಿದ್ದು ಬಿ.ಎಸ್. ಯಡಿಯೂರಪ್ಪ.ಜೈಲಿನಿಂದ ಬಿಡುಗಡೆಯಾದ ನಂತರ ಅವರು ನೇರವಾಗಿ ಹಲಸೂರಿನ ಸೋಮೇಶ್ವರ ದೇವಸ್ಥಾನಕ್ಕೆ ಭೇಟಿ ನೀಡಿದರು. ಅಲ್ಲಿ ಪೂಜೆ ಮಾಡಿಸಿದ ನಂತರ ರೇಸ್‌ಕೋರ್ಸ್ ರಸ್ತೆಯ ತಮ್ಮ ಮನೆಗೆ ತೆರಳಿದರು.

ಈ ಸಂದರ್ಭದಲ್ಲಿ ಸುದ್ದಿಗಾರರ ಜತೆ ಮಾತನಾಡಿದ ಅವರು `ಯಾರನ್ನೂ ಟೀಕೆ ಮಾಡುವುದಿಲ್ಲ~ ಎಂದು ಹೇಳುತ್ತಲೇ ವಿರೋಧಿಗಳಿಗೆ ತಿರುಗೇಟು ನೀಡಿದರು.

`ಯಾವುದೇ ಪಕ್ಷ ಅಥವಾ ವ್ಯಕ್ತಿಯನ್ನು ಗುರಿಯಾಗಿ ಇಟ್ಟುಕೊಂಡು ನಾನು ಮಾತನಾಡುವುದಿಲ್ಲ. ನನ್ನನ್ನು ಜೈಲಿಗೆ ಕಳುಹಿಸಿ ಸಂತೋಷಪಟ್ಟವರು ಪಶ್ಚಾತ್ತಾಪ ಪಡಲಿದ್ದಾರೆ. ಆ ದಿನಗಳು ಬಹಳ ದೂರ ಇಲ್ಲ~ ಎಂದರು.
ಇದೇ ಸಂದರ್ಭದಲ್ಲಿ ಹೊಸ ಪಕ್ಷ ಕಟ್ಟುವ ಯಾವ ಉದ್ದೇಶವೂ ಇಲ್ಲ ಎಂದು ಸ್ಪಷ್ಟಪಡಿಸಿದರು.

`ರಾಜ್ಯದ ಆರು ಕೋಟಿ ಜನರು ಮತ್ತೊಮ್ಮೆ ಆಶೀರ್ವಾದ ಮಾಡಿದರೆ ಮುಖ್ಯಮಂತ್ರಿಯಾಗುತ್ತೇನೆ. ನ್ಯಾಯಾಂಗ ವ್ಯವಸ್ಥೆ ಬಗ್ಗೆ ಅಪಾರ ಗೌರವ ಇದೆ. ಆದಷ್ಟು ಬೇಗ ಆರೋಪಮುಕ್ತನಾಗುವ ವಿಶ್ವಾಸ ಇದೆ~ ಎಂದರು.

`ಅಧಿಕಾರ ಶಾಶ್ವತ ಅಲ್ಲ. ನನ್ನ ಬಿಡುಗಡೆಗೆ 24 ದಿನಗಳಿಂದ ದೇವರಲ್ಲಿ ಪ್ರಾರ್ಥಿಸಿದ ಹಾಗೂ ನನ್ನ ನೋವಿಗೆ ಸ್ಪಂದಿಸಿದ ರಾಜ್ಯದ ಎಲ್ಲ ನನ್ನ ಅಭಿಮಾನಿಗಳು, ಹಿತೈಷಿಗಳಿಗೆ ಋಣಿಯಾಗಿದ್ದೇನೆ~ ಎಂದು ನುಡಿದರು.

`ನಾನು ಯಾವುದೇ ಅಕ್ರಮ ಎಸಗಿಲ್ಲ. ಆದರೂ ಜೈಲಿನಲ್ಲೇ ಈ ಸಲದ ದೀಪಾವಳಿ ಆಚರಿಸಬೇಕಾಯಿತು~ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಆರತಿ ಎತ್ತಿ ಸ್ವಾಗತ:ರೇಸ್‌ಕೋರ್ಸ್ ರಸ್ತೆಯ ಮನೆಗೆ ತೆರಳುತ್ತಿದ್ದ ಹಾಗೆಯೇ ಅವರ ಅಭಿಮಾನಿಗಳು ಪಟಾಕಿ ಸಿಡಿಸಿ ಹರ್ಷ ವ್ಯಕ್ತಪಡಿಸಿದರು. ಪುತ್ರಿಯರು ಮತ್ತು ಸೊಸೆಯಂದಿರು ಆರತಿ ಎತ್ತಿ ಯಡಿಯೂರಪ್ಪ ಅವರನ್ನು ಮನೆಗೆ ಬರಮಾಡಿಕೊಂಡರು. ಮನೆಗೆ ಹೋದವರೇ ದೇವರ ದರ್ಶನ ಪಡೆದರು.