ಮಂಗನ ಕಾಯಿಲೆ: ಆತಂಕ ಬೇಡ

ಮಂಗಳೂರು: ಬೆಳುವಾಯಿಯಲ್ಲಿ ಕ್ಯಾಸನೂರು ಕಾಡಿನ ಕಾಯಿಲೆ ಅಥವಾ ಮಂಗನ ಕಾಯಿಲೆ ವರದಿ­ಯಾಗಿರುವ ಹಿನ್ನೆಲೆಯಲ್ಲಿ ಜಿಲ್ಲಾ ಆರೋಗ್ಯ ಇಲಾಖೆ ಅಗತ್ಯ ಸಮೀಕ್ಷೆ ಮತ್ತು ತಪಾಸಣೆಗಳನ್ನು ಮಾಡಿದ್ದು, ಪೂನಾದ ನ್ಯಾಷನಲ್‌ ಇನ್‌ಸ್ಟಿ­ಟ್ಯೂಷನ್‌ ಆಫ್‌ ವೈರಾಲಜಿಯಲ್ಲಿ ನಡೆದ  ಆರ್‌ಟಿಪಿಸಿಆರ್‌ ಪರೀಕ್ಷೆಯಲ್ಲಿ ಈ ಕಾಯಿಲೆಯ ಯಾವುದೇ ಲಕ್ಷಣ­ಗಳು ಕಂಡುಬಂದಿಲ್ಲ ಎಂದು ಜಿಲ್ಲಾ ಆರೋಗ್ಯ ಅಧಿಕಾರಿ ಎಚ್‌. ಶಿವಕುಮಾರ್‌ ಹೇಳಿದ್ದಾರೆ.

ಅವರು ಸೋಮವಾರ ಸುದ್ದಿ­ಗೋಷ್ಠಿಯಲ್ಲಿ ಮಾತನಾಡುತ್ತ, ವೆನ್ಲಾಕ್‌­­ನಲ್ಲಿ ನಡೆಸಿದ ಎಲಿಸಾ ಪರೀಕ್ಷೆ ಸಂದರ್ಭ­­ದಲ್ಲಿ ಮಂಗನಕಾಯಿಲೆಯ ಲಕ್ಷಣ­­ಗಳು ಕಂಡು ಬಂದಿದ್ದರೂ ಪೂನಾದ ಪ್ರಯೋಗಾಲಯದಲ್ಲಿ ಇದು ಅಲ್ಲ ಎಂದು ಸಾಬೀತಾಗಿದೆ. ಆದರೂ ಶಂಕಿತ ಪ್ರಕರಣಗಳು ವರದಿ­ಯಾಗಿರುವ ಹಿನ್ನೆಲೆಯಲ್ಲಿ ಆರೋಗ್ಯ ಇಲಾಖೆ ಮುನ್ನೆಚ್ಚರಿಕೆಯ ಎಲ್ಲ ಕ್ರಮಗಳನ್ನು ತೆಗೆದುಕೊಳ್ಳುತ್ತಿ­ರುವು­ದಾಗಿ ಹೇಳಿದರು.

ಜಗತ್ತಿನಲ್ಲಿ ಕರ್ನಾಟಕದಲ್ಲಿ ಮಾತ್ರ ಈ ಕಾಯಿಲೆ ಕಾಣಿಸಿಕೊಳ್ಳುತ್ತಿದೆ. 2006ರಲ್ಲಿ ಕೊನೆಯ ಪ್ರಕರಣ ವರದಿ­ಯಾಗಿದೆ. 2010–11ರ ಸಾಲಿನಲ್ಲಿ ಚುಚ್ಚು­ಮದ್ದು ನೀಡುವುದನ್ನು ನಿಲ್ಲಿಸ­ಲಾಗಿದೆ. ಇದೀಗ ಮತ್ತೆ ಶಂಕಿತ ಪ್ರಕರಣ­ಗಳು ವರದಿಯಾಗಿರುವ ಹಿನ್ನೆಲೆ­ಯಲ್ಲಿ ಚುಚ್ಚುಮದ್ದು ನೀಡಲು ಅಗತ್ಯ ಸೌಕರ್ಯ ಒದಗಿಸುವಂತೆ ರಾಜ್ಯ ಸರ್ಕಾರಕ್ಕೆ ಮನವಿ ಸಲ್ಲಿಸ­ಲಾಗಿದೆ ಎಂದು ಅವರು ಹೇಳಿದರು.

ಅಲ್ಲದೆ ಕಾಯಿಲೆ ಇರುವ ಅನು­ಮಾನ­ದಲ್ಲಿ ಎರಡು ತಂಡಗಳು ಕಾರ್ಕಳ, ಉಡುಪಿ, ಮಣಿಪಾಲದಲ್ಲಿ ಸಮೀಕ್ಷೆ ನಡೆಸಿವೆ. ಅದೇ ರೀತಿ ಕಾಡು­ಗಳಲ್ಲಿ ಸಮೀಕ್ಷೆ ನಡೆಸಿದ್ದು ಎಲ್ಲಿಯೂ ಮಂಗ ಸತ್ತ ವರದಿಯಾಗಿಲ್ಲ. ಕಾಡಿನ ವ್ಯಾಪ್ತಿ­ಯ ಉಣುಗನ್ನು(ಉಣ್ಣು)  ತಪಾಸಣೆ­ಗಾಗಿ ಪೂನಾಕ್ಕೆ ಕಳುಹಿಸ­ಲಾಗಿದೆ ಎಂದರು.

ಇದೇ ಸಂದರ್ಭದಲ್ಲಿ ಎಂಡೋ­ಸಲ್ಫಾನ್‌ ಸಂತ್ರಸ್ತರಿಗೆ ಹೈಕೋರ್ಟ್‌ ಆದೇ­ಶದ ಮೇರೆಗೆ ಪರಿಹಾರ ನೀಡಿ­ರುವ ಕುರಿತು ಮಾತನಾಡಿದ ಅವರು ಏಪ್ರಿಲ್‌ 7ರೊಳಗೆ ಪರಿಹಾರ ವಿತರಿಸ­ಲಾಗುವುದು. ದಕ್ಷಿಣ ಕನ್ನಡದಲ್ಲಿ 2,204 ಮಂದಿ ಸಂತ್ರಸ್ತರ ಪೈಕಿ ಈಗಾಗಲೇ 1,301 ಮಂದಿಗೆ ಆರ್ಥಿಕ ಪರಿಹಾರ ದೊರೆತಿದೆ. 

389 ಮಂದಿಗೆ ತಾಂತ್ರಿಕ ಕಾರಣಗಳಿಂದ ಪರಿಹಾರ ನೀಡಿಕೆ ವಿಳಂಬವಾಗಿದ್ದು ಮುಂದಿನ ದಿನ­ಗಳಲ್ಲಿ ವಿತರಿಸಲಾಗುವುದು.

ಮಾರ್ಚ್‌ 27ರವರೆಗೆ ಮರು ಸಮೀಕ್ಷೆ ನಡೆಯ­ಲಿದ್ದು ಸಂತ್ರಸ್ತರನ್ನು ಗುರುತಿ­ಸುವ ಕಾರ್ಯ ಮುಂದುವರೆಯಲಿದೆ ಎಂದರು.

ಸಾಮಾನ್ಯವಾಗಿ ಮಂಗಗಳು ಸಾಯುವುದೇ ಕಾಯಿಲೆಯ ಮುನ್ಸೂಚನೆ. ಆದ್ದರಿಂದ ಮಂಗಗಳು ಸತ್ತ ಸುದ್ದಿಯನ್ನು ಆರೋಗ್ಯ ಇಲಾಖೆಗೆ ತಿಳಿಸಿದರೆ ಸತ್ತ ಮಂಗಗಳ ದೇಹದ ಭಾಗಗಳನ್ನು ತೆಗೆದು ಹೆಚ್ಚಿನ ಪರೀಕ್ಷೆಗೆ ಕಳುಹಿಸಿ ಕಾಯಿ­ಲೆಯ ಬಗ್ಗೆ ದೃಢೀಕರಿಸುತ್ತಾರೆ. ಸತ್ತ ಮಂಗಗಳನ್ನು ಸುಟ್ಟು ಐವತ್ತು ಮೀಟರ್‌ ಸುತ್ತಲೂ ಮೆಲಾಥಿನ್‌ ಪುಡಿಯನ್ನು ಸಿಂಪಡಿಸಲಾಗುತ್ತದೆ. ಸತತ ಎಂಟು ಹತ್ತು ದಿನಗಳವರೆಗೆ ಬರುವ ಜ್ವರ, ವಿಪರೀತ ತಲೆ ನೋವು, ಕೈ ಕಾಲು ಸೊಂಟ ನೋವು, ವಿಪರೀತ ನಿಶ್ಯಕ್ತಿ, ಕಣ್ಣುಗಳು ಕೆಂಪಾಗುವುದು, ಜ್ವರ ಬಂದು ನಾಲ್ಕಾರು ದಿನಗಳಲ್ಲಿ ಕಣ್ಣು, ಮೂಗು, ಬಾಯಿ, ಗುದ ದ್ವಾರ­ದಿಂದ ರಕ್ತ ಬರುವುದು ಈ ರೋಗದ ಮುಖ್ಯ ಲಕ್ಷಣ. ಕೈಕಾಲು ಸ್ವಾಧೀನ ತಪ್ಪುವುದು, ಎಚ್ಚರ ತಪ್ಪುವುದೂ ಉಂಟು. ಈ ರೋಗ ಉಣುಗುಗಳ ಮೂಲಕ ಹರಡುತ್ತದೆ.

ಮಂಗನ ಕಾಯಿಲೆ ನಿಯಂತ್ರಿಸುವ ಲಸಿಕೆ ಇದೀಗ ಬಂದಿದ್ದು ಇದನ್ನು 6 ವರ್ಷ ಮೇಲ್ಪಟ್ಟ ಎಲ್ಲರೂ ತೆಗೆದುಕೊಳ್ಳಬಹುದು. ಎರಡನೇ ಚುಚ್ಚು­ಮದ್ದನ್ನು ಹಾಕಿಸಿಕೊಂಡ ಇಪ್ಪತ್ತು ದಿನಗಳ ನಂತರ ರೋಗ ನಿರೋಧಕ ಶಕ್ತಿ ಬರು­ತ್ತದೆ. ಆದರೆ ಈ ಕಾಯಿಲೆಗೆ ನಿರ್ದಿಷ್ಟ ಔಷಧಿ ಇಲ್ಲ. ಚುಚ್ಚುಮದ್ದನ್ನು ಹಾಕಿ­ಸಿ­ಕೊಳ್ಳುವುದರಿಂದ ಯಾವ ತರಹದ ದುಷ್ಪರಿಣಾಮವೂ ಇರುವುದಿಲ್ಲ ಎಂದು ಆರೋಗ್ಯ ಇಲಾಖೆ ಪ್ರಕಟಣೆ ತಿಳಿಸಿದೆ.

ಕಾಯಿಲೆ ಲಕ್ಷಣಗಳೇನು?
ಸಾಮಾನ್ಯವಾಗಿ ಮಂಗಗಳು ಸಾಯುವುದೇ ಕಾಯಿಲೆಯ ಮುನ್ಸೂಚನೆ. ಆದ್ದರಿಂದ ಮಂಗಗಳು ಸತ್ತ ಸುದ್ದಿಯನ್ನು ಆರೋಗ್ಯ ಇಲಾಖೆಗೆ ತಿಳಿಸಿದರೆ ಸತ್ತ ಮಂಗಗಳ ದೇಹದ ಭಾಗಗಳನ್ನು ತೆಗೆದು ಹೆಚ್ಚಿನ ಪರೀಕ್ಷೆಗೆ ಕಳುಹಿಸಿ ಕಾಯಿ­ಲೆಯ ಬಗ್ಗೆ ದೃಢೀಕರಿಸುತ್ತಾರೆ. ಸತ್ತ ಮಂಗಗಳನ್ನು ಸುಟ್ಟು ಐವತ್ತು ಮೀಟರ್‌ ಸುತ್ತಲೂ ಮೆಲಾಥಿನ್‌ ಪುಡಿಯನ್ನು ಸಿಂಪಡಿಸಲಾಗುತ್ತದೆ.

ಸತತ ಎಂಟು ಹತ್ತು ದಿನಗಳವರೆಗೆ ಬರುವ ಜ್ವರ, ವಿಪರೀತ ತಲೆ ನೋವು, ಕೈ ಕಾಲು ಸೊಂಟ ನೋವು, ವಿಪರೀತ ನಿಶ್ಯಕ್ತಿ, ಕಣ್ಣುಗಳು ಕೆಂಪಾಗುವುದು, ಜ್ವರ ಬಂದು ನಾಲ್ಕಾರು ದಿನಗಳಲ್ಲಿ ಕಣ್ಣು, ಮೂಗು, ಬಾಯಿ, ಗುದ ದ್ವಾರ­ದಿಂದ ರಕ್ತ ಬರುವುದು ಈ ರೋಗದ ಮುಖ್ಯ ಲಕ್ಷಣ. ಕೈಕಾಲು ಸ್ವಾಧೀನ ತಪ್ಪುವುದು, ಎಚ್ಚರ ತಪ್ಪುವುದೂ ಉಂಟು. ಈ ರೋಗ ಉಣುಗುಗಳ ಮೂಲಕ ಹರಡುತ್ತದೆ.

ಮಂಗನ ಕಾಯಿಲೆ ನಿಯಂತ್ರಿಸುವ ಲಸಿಕೆ ಇದೀಗ ಬಂದಿದ್ದು ಇದನ್ನು 6 ವರ್ಷ ಮೇಲ್ಪಟ್ಟ ಎಲ್ಲರೂ ತೆಗೆದುಕೊಳ್ಳಬಹುದು. ಎರಡನೇ ಚುಚ್ಚು­ಮದ್ದನ್ನು ಹಾಕಿಸಿಕೊಂಡ ಇಪ್ಪತ್ತು ದಿನಗಳ ನಂತರ ರೋಗ ನಿರೋಧಕ ಶಕ್ತಿ ಬರು­ತ್ತದೆ. ಆದರೆ ಈ ಕಾಯಿಲೆಗೆ ನಿರ್ದಿಷ್ಟ ಔಷಧಿ ಇಲ್ಲ. ಚುಚ್ಚುಮದ್ದನ್ನು ಹಾಕಿ­ಸಿ­ಕೊಳ್ಳುವುದರಿಂದ ಯಾವ ತರಹದ ದುಷ್ಪರಿಣಾಮವೂ ಇರುವುದಿಲ್ಲ ಎಂದು ಆರೋಗ್ಯ ಇಲಾಖೆ ಪ್ರಕಟಣೆ ತಿಳಿಸಿದೆ.