ಮಾಜಿ ಶಾಸಕ ಎಸ್. ಸುಬ್ಬಯ್ಯ ನಾಯ್ಕ ನಿಧನ

ಸುಳ್ಯ:  ಸುಳ್ಯದ ಮೊದಲ ಶಾಸಕ, ಸ್ವಾತಂತ್ರ್ಯ ಹೋರಾಟಗಾರ ಬೊಳಿಯಮಜಲು ನಿವಾಸಿ ಎಸ್.ಸುಬ್ಬಯ್ಯ ನಾಯ್ಕ ಭಾನುವಾರ ರಾತ್ರಿ ನಿಧನರಾದರು.

1952ರಲ್ಲಿ ಪುತ್ತೂರು ವಿಧಾನ ಸಭಾ ಕ್ಷೇತ್ರದಲ್ಲಿ ಪರಿಶಿಷ್ಟ ಮೀಸಲು ಅಭ್ಯರ್ಥಿಯಾಗಿ ಕಾಂಗ್ರೆಸ್ ಪಕ್ಷದಿಂದ ಸ್ಪರ್ಧಿಸಿ ವಿಧಾನಸಭೆ ಪ್ರವೇಶಿಸಿದ್ದ ಅವರು, ಬಳಿಕ 1957ರಲ್ಲಿ ಸುಳ್ಯ ವಿಧಾನಸಭಾ ಕ್ಷೇತ್ರವಾಗಿ ಘೋಷಣೆಯಾದಾಗ ಇಲ್ಲಿ ಸ್ಪರ್ಧಿಸಿ ಮರು ಆಯ್ಕೆಯಾಗಿದ್ದರು. ಗಾಂಧಿವಾದಿಯಾಗಿದ್ದ ಸುಬ್ಬಯ್ಯ ನಾಯ್ಕರು ಸರಳ ಸಜ್ಜನಿಕೆಯ ವ್ಯಕ್ತಿ. 10 ವರ್ಷಗಳ ಕಾಲ ಶಾಸಕರಾಗಿದ್ದು, ಆ ಅವಧಿಯಲ್ಲೇ ಸುಳ್ಯ ತಾಲ್ಲೂಕು ಅಸ್ತಿತ್ವಕ್ಕೆ ಬಂದಿತ್ತು.