ವಿಫಲ ಮೂತ್ರಪಿಂಡದ ಜೊತೆಗೇ ಸಾಗಿದೆ ಬಾಲಕಿಯ ಬದುಕು

ಬಳ್ಳಾರಿ: ತಮ್ಮ ಕಣ್ಮುಂದೆಯೇ ಬೆಳೆದ ಬಾಲಕಿಯೊಬ್ಬಳನ್ನು ಉಳಿಸಿಕೊಳ್ಳಲು ಊರವರೇ ನಿಂತಿರುವ ಅಪರೂಪದ ಪ್ರಕರಣವಿದು. ಆಕೆಯ ಚಿಕಿತ್ಸೆಗಾಗಿ ಆ ಗ್ರಾಮದ ಜನರು ನಿಸ್ವಾರ್ಥದಿಂದ ತನು–ಮನ–ಧನದೊಂದಿಗೆ ಸೇವೆಗೆ ಮುಂದಾಗಿದ್ದಾರೆ.
ಜಿಲ್ಲೆಯ ಹಗರಿಬೊಮ್ಮನಹಳ್ಳಿ ತಾಲ್ಲೂಕಿನ ಮಾಲವಿ ಗ್ರಾಮದ ಕೊಟ್ರೇಶ್ವರ ಶಾಲೆಯಲ್ಲಿ 9ನೇ ತರಗತಿ ಓದುತ್ತಿರುವ ತಿಪ್ಪಕ್ಕ ಇದೀಗ ಊರಿನ ಮಗಳು.

ಸಾಕುತಾಯಿ ಚಿಮ್ನಳ್ಳಿ ಕಾಳಮ್ಮ, ತಿಪ್ಪಕ್ಕನನ್ನು ನಗರದ ವಿಮ್ಸ್‌ ಆಸ್ಪತ್ರೆಗೆ ದಾಖಲಿಸಿ ನಾಲ್ಕು ದಿನವಾಗಿದೆ. ಹೀಗೆ ಆ ತಾಯಿ ಅವಳನ್ನು ಚಿಕಿತ್ಸೆಗೆ ಸೇರಿಸುತ್ತಿರುವುದು ನಾಲ್ಕನೇ ಬಾರಿ.

ತಿಪ್ಪಕ್ಕನ ಮೂತ್ರಪಿಂಡವೊಂದು ವಿಫಲವಾಗಿದೆ. ಬದಲಿ ಮೂತ್ರಪಿಂಡ ಅಳವಡಿಕೆ ಸೇರಿದಂತೆ ಒಂದು ವರ್ಷ ಚಿಕಿತ್ಸೆ ನೀಡಲು ₹ 5.50 ಲಕ್ಷ ಬೇಕಾಗುತ್ತದೆ ಎಂದು ಮಣಿಪಾಲದ ಕಸ್ತೂರಬಾ ಆಸ್ಪತ್ರೆಯ ವೈದ್ಯರು ಆಗಸ್ಟ್‌ ತಿಂಗಳಲ್ಲಿ ಬರೆದುಕೊಟ್ಟ ಪತ್ರ ಕಾಳಮ್ಮನ ಬಳಿ ಇದೆ. ಹಳ್ಳಿಯಲ್ಲಿ ಆಶ್ರಯ ಯೋಜನೆಯಡಿ ನಿರ್ಮಿಸಿದ ಸೂರೊಂದನ್ನು ಬಿಟ್ಟರೆ ಆಕೆಯದು ಎನ್ನುವುದು ಏನೂ ಇಲ್ಲ. ಸಾಕುಮಗಳನ್ನು ಉಳಿಸಿಕೊಳ್ಳುವುದೇ ಜೀವನದ ಪರಮಗುರಿ ಎನ್ನುತ್ತಿರುವ ಈ ವೃದ್ಧೆಯ ಬಳಿ ಹಣ ಇಲ್ಲ. ಇರುವುದು ನೆರವಿಗೆ ಯಾಚಿಸುವ ಕಣ್ಣೀರು ಮಾತ್ರ. ಇಂಥ ವೇಳೆಯಲ್ಲಿ ನೆರವಿಗೆ ಬಂದವರು ಮಾಲವಿ ಗ್ರಾಮದ ಜನ. ತಮ್ಮ ಕೆಲಸ ಕಾರ್ಯಗಳನ್ನು ಬದಿಗೊತ್ತಿ ಬಾಲಕಿಯ ಚಿಕಿತ್ಸೆಗೆ ನೆರವಾಗುತ್ತಿದ್ದಾರೆ.

ಆಸ್ಪತ್ರೆಯ ಮಕ್ಕಳ ತುರ್ತು ಚಿಕಿತ್ಸಾ ಘಟಕಕ್ಕೆ ಸೋಮವಾರ ‘ಪ್ರಜಾವಾಣಿ’ ಭೇಟಿ ನೀಡಿದ ವೇಳೆ, ಗ್ರಾಮಸ್ಥರಾದ ಅಕ್ಕಸಾಲಿಗ ಕೃಷ್ಣಾಚಾರಿ, ರೈತರಾದ ಜಯಣ್ಣ ಮತ್ತು ಸಂತೋಷ್‌ ಬಾಲಕಿಯ ಬಳಿ ಇದ್ದರು. ಅವರ ಕೈಯಲ್ಲಿ ಬಾಲಕಿಯ ಆರೋಗ್ಯದ ಕುರಿತ ತಪಾಸಣಾ ವರದಿಗಳಿದ್ದವು. ಅವುಗಳಿಗೆ ಅವರೇ ಹಣ ನೀಡಿದ್ದರು.

‘ಬಾಲಕಿಗೆ ಮೂತ್ರಪಿಂಡದ ಸಮಸ್ಯೆ ಇದೆ ಎಂಬ ಮಾಹಿತಿ ದೊರೆತ ಕೂಡಲೇ ಮಣಿಪಾಲ್‌ಗೆ ಕರೆದೊಯ್ದೆವು. ಆದರೆ ಚಿಕಿತ್ಸೆಗೆ ಅಷ್ಟೊಂದು ಹಣ ಇಲ್ಲದ್ದರಿಂದ ವಾಪಸು ಬಂದೆವು’ ಎಂದು ಸಂತೋಷ್‌ ತಿಳಿಸಿದರು.

ನೆರವಿಗಾಗಿ: ಚಿಮ್ನಳ್ಳಿ ತಿಪ್ಪಕ್ಕಳ ಬ್ಯಾಂಕ್‌ ಖಾತೆ ಸಂಖ್ಯೆ: 35159759412, ಐಎಫ್‌ಎಸ್‌ಸಿ: ಎಸ್‌ಬಿಐಎನ್ 00113211.