‘ಸಿದ್ದರಾಮಯ್ಯ, ಹೊರಟ್ಟಿ ಜನರ ಕ್ಷಮೆಯಾಚಿಸಲಿ’: ಈಶ್ವರಪ್ಪ

ಶಿವಮೊಗ್ಗ: ‘ಸ್ವಾಮೀಜಿಗಳನ್ನು ನೇರವಾಗಿ ರಾಜಕೀಯಕ್ಕೆ ಕರೆದುಕೊಂಡು ಬಂದಿದ್ದೇ ಬಸವರಾಜ ಹೊರಟ್ಟಿಯವರು. ಸಾಧು-ಸಂತರನ್ನು ಬೀದಿಗೆ ಇಳಿಸಿದ್ದಕ್ಕೆ ಸಿದ್ದರಾಮಯ್ಯ ಮತ್ತು ಹೊರಟ್ಟಿ ರಾಜ್ಯದ ಜನರ ಕ್ಷಮೆ ಕೇಳಬೇಕು’ ಎಂದು ಶಾಸಕ ಕೆ.ಎಸ್‌. ಈಶ್ವರಪ್ಪ ಒತ್ತಾಯಿಸಿದರು.

‘ಸ್ವಾಮೀಜಿಗಳು ರಾಜಕೀಯ ಹೇಳಿಕೆ ನೀಡಬಾರದು’ ಎಂಬ ಬಸವರಾಜ ಹೊರಟ್ಟಿ ಹೇಳಿಕೆಗೆ ಮಂಗಳವಾರ ಇಲ್ಲಿ ಸುದ್ದಿಗಾರರಿಗೆ ಪ್ರತಿಕ್ರಿಯೆ ನೀಡಿದ ಅವರು, ‘ಕರ್ನಾಟಕದಲ್ಲಿ ವೀರಶೈವ– ಲಿಂಗಾಯತ ಪ್ರಶ್ನೆಯೇ ಇರಲಿಲ್ಲ. ಆದರೆ, ಹೊರಟ್ಟಿ ಅವರು, ಸಿದ್ದರಾಮಯ್ಯ ಮುಖ್ಯಮಂತ್ರಿಯಾಗಿದ್ದಾಗ ಅನೇಕ ಸ್ವಾಮೀಜಿಗಳನ್ನು ಕರೆತಂದು ರಾಜಕೀಯ ಮಾಡಲು ಯತ್ನಿಸಿದರು. ಇದರಿಂದ ಕಾಂಗ್ರೆಸ್‌ ಮತ್ತು ಜೆಡಿಎಸ್‌ ಪಕ್ಷದವರು ಚುನಾವಣೆಯಲ್ಲಿ ಹೊಡೆತ ತಿಂದರು’ ಎಂದು ಹೇಳಿದರು.