ಶ್ರವಣಬೆಳಗೊಳ: ಬಾಹುಬಲಿ ಮಹಾಮಸ್ತಕಾಭಿಷೇಕದ ವಿಶೇಷ ಆಕರ್ಷಣೆಯಾಗಿ ‘ಹೆಲಿಟೂರಿಸಂ’ಗೆ ಬುಧವಾರ ಚಾಲನೆ ದೊರೆಯಿತು. ಮೊದಲ ದಿನವೇ ಹಲವು ಮಂದಿ ಹೆಲಿಕಾಪ್ಟರ್ನಲ್ಲಿ ಕುಳಿತು ಅಭಿಷೇಕದ ಮನೋಹರ ದೃಶ್ಯಕ್ಕೆ ಪುಳಕಿತರಾದರು.
ಹುಬ್ಬಳ್ಳಿಯ ಬಾಹುಬಲಿ ಹೆಲಿಟೂರಿಸಂ ಸಂಸ್ಥೆಗೆ ಗುತ್ತಿಗೆ ನೀಡಲಾಗಿದೆ. ಒಬ್ಬರಿಗೆ ₹ 2,100 ದರ ಇದ್ದು, 10 ನಿಮಿಷ ಹಾರಾಡಬಹುದು.
ವಿಂಧ್ಯಗಿರಿಯ ನೋಟ, ಬಾಹುಬಲಿಯ ದರ್ಶನ, ಚಂದ್ರಗಿರಿಯ 14 ಪ್ರಾಚೀನ ಬಸದಿಗಳು, ಸಾಮ್ರಾಟ್ ಚಂದ್ರಗುಪ್ತ ಮೌರ್ಯ ಭದ್ರಬಾಹು ಗುಹೆಗಳು, 12 ಉಪನಗರಗಳನ್ನು ತೋರಿಸಲಾಗುತ್ತದೆ. ಶ್ರವಣಬೆಳಗೊಳದ ಸುತ್ತಲೂ ಇರುವ ಬಸದಿಗಳು, ಮಂದಿರ, ಮಸೀದಿಗಳು, ಜೋಡಿ ಬೆಟ್ಟದ ನಡುವೆ ಇರುವ ಚಿಕ್ಕದೇವರಾಜ ಒಡೆಯರ ಕಲ್ಯಾಣಿ, ಸುತ್ತಲಿನ ತೆಂಗಿನ ಮರಗಳ ನೈಸರ್ಗಿಕ ನೋಟವನ್ನು ಕಣ್ತುಂಬಿಕೊಳ್ಳಬಹುದು.
ಅನಿವಾಸಿ ಭಾರತೀಯರ ಅಭಿಷೇಕ: ಅಮೆರಿಕ, ಇಂಗ್ಲೆಂಡ್, ಜರ್ಮನಿ, ಕೀನ್ಯಾ, ದುಬೈ, ಬ್ರೆಜಿಲ್, ಇಂಡೋನೇಷ್ಯಾ ಸೇರಿದಂತೆ ವಿವಿಧ ದೇಶಗಳಿಂದ ಬಂದಿದ್ದ 250ಕ್ಕೂ ಹೆಚ್ಚು ಅನಿವಾಸಿ ಭಾರತೀಯರು ಬುಧವಾರ ಬಾಹುಬಲಿಗೆ ರಜತ ಕಲಶದಲ್ಲಿ ಅಭಿಷೇಕ ನೆರವೇರಿಸಿದರು.
ಲಂಡನ್ನಲ್ಲಿ ವಾಸವಿರುವ ಸಂಕೀಘಟ್ಟದ ನವೀನ್ ಮತ್ತು ಕುಟುಂಬದವರು ಥೇಮ್ಸ್ ನದಿ ನೀರು ತಂದು ಅಭಿಷೇಕ ನೆರವೇರಿಸಿದ್ದು ವಿಶೇಷವಾಗಿತ್ತು.
ಅಮೆರಿಕದ ಪಿಯೂಷ್ ರಾಜಶ್ರೀ ಮತ್ತು ಪ್ರಧ್ಯುಮ್ನ ಅವರು ‘ಮಹಾಮಸ್ತಕಾಭಿಷೇಕದಲ್ಲಿ ಭಾಗವಹಿಸುತ್ತಿದ್ದು ಖುಷಿ ತಂದಿದೆ’ ಎಂದರು.
ಫೆ. 22ರಂದು ಕೂಡ ಅನಿವಾಸಿ ಭಾರತೀಯರಿಗೆ ಅಭಿಷೇಕದಲ್ಲಿ ಪಾಲ್ಗೊಳ್ಳುವ ಅವಕಾಶ ನೀಡಲಾಗಿದೆ ಎಂದು ಅನಿವಾಸಿ ಭಾರತೀಯರ ಸಮಿತಿ ಉಪಾಧ್ಯಕ್ಷೆ ಆರತಿ ಕೃಷ್ಣ ತಿಳಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.