ಕೊರೊನಾ ಸಾಂತ್ವನ | ಕೌಟುಂಬಿಕ ದೌರ್ಜನ್ಯ: ಪಾರಾಗುವುದು ಹೇಗೆ?
ಲಾಕ್‌ಡೌನ್ ನಂತರ, ಕೌಟುಂಬಿಕ ದೌರ್ಜನ್ಯ ಹೆಚ್ಚಿರುವ ಬಗ್ಗೆ ಸಾಕಷ್ಟು ಪ್ರಕರಣಗಳು ವರದಿಗಳಾಗಿವೆ. ರಾಷ್ಟ್ರೀಯ ಮಹಿಳಾ ಆಯೋಗವು ಒದಗಿಸಿರುವ ಮಾಹಿತಿ ಪ್ರಕಾರ, ಸಹಾಯವಾಣಿ (ಕೌಟುಂಬಿಕ ದೌರ್ಜನ್ಯ) ಕರೆಗಳ ಸಂಖ್ಯೆಯಲ್ಲಿ ಗಮನಾರ್ಹ ಹೆಚ್ಚಳವಾಗಿದೆ. ಈ ದೌರ್ಜನ್ಯ ಮಹಿಳೆಯರಿಗೊಂದೇ ಸೀಮಿತವಾಗಿಲ್ಲ, ಇದರಲ್ಲಿ ಮಕ್ಕಳು ಹಾಗೂ ವೃದ್ಧರೂ ಇದ್ದಾರೆ.
ಮಹಿಳೆಯರು ಶೋಷಣೆ ಮಾಡುವವರೊಂದಿಗೆ ಲಾಕ್‌ಡೌನ್ ಕಾರಣದಿಂದ ಒಂದೇ ಸ್ಥಳದಲ್ಲಿ ಹೆಚ್ಚಿನ ಸಮಯ ಇರುವುದರಿಂದ ದೌರ್ಜನ್ಯ ಹೆಚ್ಚಾಗುವ ಸಾಧ್ಯತೆ ಇದೆ. ಇದಲ್ಲದೇ ಈ ಸಮಯದಲ್ಲಿ ಸಾಂತ್ವನ ಕೇಂದ್ರಗಳನ್ನು ಸಂಪರ್ಕಿಸಲು ಅಥವಾ ತಲುಪುವುದು ಕಷ್ಟ.
ದೌರ್ಜನ್ಯವು ಕೇವಲ ದೈಹಿಕಕ್ಕೆ ಮೀಸಲಾಗಿರದೆ, ಮಾನಸಿಕ ಮತ್ತು ಲೈಂಗಿಕವಾಗಿಯೂ ಇರಬಹುದು. ಈ ರೀತಿ ದೌರ್ಜನ್ಯಕ್ಕೆ ಒಳಪಟ್ಟಿರುವ ಮಹಿಳೆಯರಿಗೆ ಮಾನಸಿಕ ಸಮಸ್ಯೆ ತಲೆದೋರಬಹುದು. ಅವರು ಖಿನ್ನತೆ, ಒತ್ತಡ ಮತ್ತು ಆಘಾತದ ನಂತರ ಬರುವ ಬೇರೆ ಮಾನಸಿಕ ಕಾಯಿಲೆಗಳಿಗೆ ಒಳಗಾಗಬಹುದು. ಈ ಪರಿಸ್ಥಿತಿಯಲ್ಲಿ ಅವರಿಗೆ ಮಾನಸಿಕ ವೇದನೆ, ಆತಂಕ, ಗಾಬರಿ, ನಿದ್ರೆ ಬಾರದಿರುವುದು,ಆಘಾತದ ಬಗ್ಗೆ ಪದೆಪದೆ ಯೋಚನೆ ಕಾಡಬಹುದು. ಈ ಮಾನಸಿಕ ತೊಂದರೆಗಳಿಂದ ಅವರಿಗೆ ಅಸಹಾಯಕ ಭಾವನೆ ಉಂಟಾಗಬಹುದು, ಒತ್ತಡದ ಪರಿಸ್ಥಿತಿಯನ್ನು ನಿಭಾಯಿಸಲು ಕಷ್ಟವಾಗಬಹುದು.
ಕೌಟುಂಬಿಕ ದೌರ್ಜನ್ಯಕ್ಕೆ ಒಳಗಾದಮಹಿಳೆಯರು ಏನು ಮಾಡಬೇಕು?
* ನಿಮ್ಮ ಸ್ನೇಹಿತರು ಅಥವಾ ಕುಟುಂಬದವರನ್ನು ದೂರವಾಣಿ ಅಥವಾ ಸಾಮಾಜಿಕ ಮಾಧ್ಯಮದ ಮೂಲಕ ಸಂಪರ್ಕಿಸಿ ನಿಮ್ಮ ಪರಿಸ್ಥಿತಿ ಬಗ್ಗೆ ಅರಿವು ಮೂಡಿಸಿ.
* ನಿಮ್ಮ ಮನೆಯಲ್ಲಿ ದೌರ್ಜನ್ಯದ ಸಂದರ್ಭದಲ್ಲಿ ಸುರಕ್ಷಿತವಾದ ಒಂದು ಸ್ಥಳವನ್ನು ಗುರುತಿಸಿ. ದೌರ್ಜನ್ಯ ಹೆಚ್ಚಾದಾಗ ನೀವು ಅಲ್ಲಿ ಆಶ್ರಯ ಪಡೆಯಬಹುದು.
* ಪೊಲೀಸರ ತುರ್ತು ಸಂಪರ್ಕ ಸಂಖ್ಯೆ ಅಥವಾ ಹೆಣ್ಣುಮಕ್ಕಳ ಸಹಾಯವಾಣಿ ಸಂಖ್ಯೆಯನ್ನು ಯಾವಾಗಲೂ ನಿಮ್ಮ ಬಳಿ ಇಟ್ಟುಕೊಳ್ಳಿ.
* ತುರ್ತು ಪರಿಸ್ಥಿತಿಯಲ್ಲಿ ನೀವು ಮನೆಯಿಂದ ಹೊರಗಿರಬೇಕಾಗಿ ಬಂದರೆ ಸ್ವಲ್ಪ ನಗದು ಮತ್ತು ಬಟ್ಟೆಗಳನ್ನು ಸಿದ್ಧವಾಗಿಟ್ಟುಕೊಳ್ಳಿ.
* ದೌರ್ಜನ್ಯದ ಬಗ್ಗೆ ದೂರವಾಣಿ ಸಂದೇಶಗಳು ಅಥವಾ ಸಾಮಾಜಿಕ ಮಾಧ್ಯಮದ ಮೂಲಕ ನಿಮಗೆ ಯಾವುದೇ ಬೆದರಿಕೆಗಳು ಬಂದಿದ್ದರೆ ಆ ಪ್ರತಿಗಳನ್ನು ಉಳಿಸಿಕೊಳ್ಳಿ.
* ಈ ಹಿಂದೆ ದೌರ್ಜನ್ಯಕ್ಕೆ ಕಾರಣವಾದ ಸಂದರ್ಭವನ್ನು ಗುರುತಿಸಿ, ಸಾಧ್ಯವಾದಷ್ಟು ಅವುಗಳಿಂದ ದೂರವಿರಿ.
* ನೀವು ಕೌಟುಂಬಿಕ ದೌರ್ಜನ್ಯಕ್ಕೆ ಒಳಗಾಗಿದ್ದರೆ ಅಥವಾ ಅಂತಹ ಪರಿಸ್ಥಿತಿಯಲ್ಲಿ ಇರುವ ಮಹಿಳೆಗೆ ಸಹಾಯ ಮಾಡಲು ಬಯಸುವುದಾದರೆ, ನೀವು ಸಹಾಯವಾಣಿಯನ್ನು ಸಂಪರ್ಕಿಸಬಹುದು.
* ಮಕ್ಕಳು ಈ ದೌರ್ಜನ್ಯವನ್ನು ನೋಡಿದ್ದಲ್ಲಿ ಅವರು ಕೂಡ ಸಹಾಯವಾಣಿಗೆ ಕರೆ ಮಾಡಬಹುದು.
* ಲಾಕ್‌ಡೌನ್‌ನ ಈ ಸಂದರ್ಭದಲ್ಲಿ ಫೋನ್ ಕರೆ ಮಾಡುವಾಗ ಗೌಪ್ಯತೆಯ ಕೊರತೆಯಿದ್ದರೆ, ಸ್ನೇಹಿತರು ಅಥವಾ ಸಂಬಂಧಿಗಳೊಡನೆ ಕೋಡ್ ವರ್ಡ್ (ಉದಾ: ಹಣ್ಣು, ತರಕಾರಿ ಇತ್ಯಾದಿ ಹೆಸರು) ಬಳಸಿ ಸಹಾಯ ಕೇಳಬಹುದು.
(ಸಹಾಯವಾಣಿ ಸಂಖ್ಯೆಗಳು:100, 08022943225 / 22943227
ನಿಮ್ಹಾನ್ಸ್ ಸೆಂಟರ್ ಫಾರ್ ವೆಲ್ ಬೀಯಿಂಗ್: 9480829670
ಬೆಂಬಲ: 9980660548, ಪರಿವರ್ತನ: 7676602602)
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.