ಬಿಳಿಗಿರಿರಂಗನ ಬೆಟ್ಟದಲ್ಲಿ ಕಾಳ್ಗಿಚ್ಚು

ಯಳಂದೂರು: ತಾಲ್ಲೂಕಿನ ಬಿಳಿಗಿರಿರಂಗನಬನದ ಹುಲ್ಲು ಬೆಟ್ಟಗಳ ಸುತ್ತಮುತ್ತ ಭಾನುವಾರ ಮಧ್ಯಾಹ್ನ ಕಾಳ್ಗಿಚ್ಚು ಕಾಣಿಸಿಕೊಂಡಿತು.

ಬಿಆರ್‌ಟಿ ಬಾಳೆಬರೆ ವ್ಯಾಪ್ತಿಯ ಹುಲ್ಲು ಬೆಟ್ಟಗಳ ಸಾಲುಗಳ ನಡುವೆ ಮಧ್ಯಾಹ್ನ 1 ಗಂಟೆ ಸುಮಾರಿಗೆ ಬೆಂಕಿ ಕಾಣಿಸಿಕೊಂಡು ದಟ್ಟ ಹೊಗೆ ಆವರಿಸಿತ್ತು. 15 ಕಿ.ಮೀ. ದೂರದ ವರೆಗೂ ಹೊಗೆ ಕಾಣಿಸುತಿತ್ತು.

ಚಿಕ್ಕಮಲ್ಕಿ, ದೊಡ್ಡಮಲ್ಕಿ, ಆಕಾಶಬರೆ ಸಮೀಪ ಬೆಂಕಿ ಆವರಿಸಿತ್ತು. ನಂತರ ಒಣ ಉದುರೆಲೆ, ಅಲ್ಲಲ್ಲಿ ಕಂಡುಬರುವ ಸೋಲಾ ಅರಣ್ಯ, ಬೆಟ್ಟದ ಅಕ್ಕಪಕ್ಕದ ಸವನ್ನಾ ಹುಲ್ಲುಗಾವಲು ಹಾಗೂ ಬನದ ತಳಭಾಗದಲ್ಲಿ ಕಂಡುಬರುವ ಉದುರೆಲೆ ಕಾನನದ ಸುತ್ತಮುತ್ತ ಹೊಗೆ ಆವರಿಸಿತ್ತು. ಅಡವಿಯ ತುಂಬ ಬೆಳೆದಿರುವ ಲಂಟಾನ ಸಹ ಬೆಂಕಿ ಅವಘಡ ತೀವ್ರವಾಗಲು ಕಾರಣವಾಗಿದೆ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದರು. ಸಂಜೆ 5ರ ವೇಳೆಗೆ ಕಾಳ್ಗಿಚ್ಚು ನಿಯಂತ್ರಣಕ್ಕೆ ಬಂದಿದೆ ಎಂದು ಯಳಂದೂರು ವಲಯ ಅರಣ್ಯ ಅಧಿಕಾರಿ ಮಾಹಿತಿ ನೀಡಿದರು.