ನಂಜನಗೂಡು: ಒಂದೂವರೆ ತಿಂಗಳಲ್ಲಿ ₹1.98 ಕೋಟಿ ದಾಖಲೆಯ ಕಾಣಿಕೆ

ನಂಜನಗೂಡು: ನಂಜನಗೂಡು ಶ್ರೀಕಂಠೇಶ್ವರ ದೇವಾಲಯಕ್ಕೆ ಕಳೆದ ಒಂದೂವರೆ ತಿಂಗಳಿನಲ್ಲಿ ದಾಖಲೆಯ ₹ 1.98 ಕೋಟಿ ಕಾಣಿಕೆ ಹರಿದುಬಂದಿದೆ.

ದೇವಾಲಯದ 31 ಹರಕೆ ಹುಂಡಿಗಳಲ್ಲಿನ ಹಣ ಎಣಿಕೆ ಕಾರ್ಯ ಗುರುವಾರ ತಡರಾತ್ರಿಯವರೆಗೆ ನಡೆದಿದ್ದು, ₹1.98 ಕೋಟಿ ನಗದು, 77 ಗ್ರಾಂ ಚಿನ್ನ, 5.7 ಕೆ.ಜಿ ಬೆಳ್ಳಿ ಹಾಗೂ ವಿವಿಧ ದೇಶಗಳ 16 ನೋಟುಗಳು ಲಭ್ಯವಾಗಿವೆ. ಇದು ಇದುವರೆಗೆ ಸಂಗ್ರಹವಾದ ಕಾಣಿಕೆಯಲ್ಲಿಯೇ ಅತಿ ಹೆಚ್ಚು ಎಂದು ತಿಳಿದುಬಂದಿದೆ.

‘ಕೋವಿಡ್–19 ನಿರ್ಬಂಧ ಸಡಿಲಗೊಳಿಸಿ, ಭಕ್ತರಿಗೆ ದರ್ಶನಕ್ಕೆ ಅವಕಾಶ ಕಲ್ಪಿಸಿದ್ದರಿಂದ ಕಾರ್ತಿಕ ಮಾಸದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ದೇವಾಲಯಕ್ಕೆ ಭೇಟಿ ನೀಡಲು ಸಾಧ್ಯವಾಯಿತು. ಹೀಗಾಗಿ ಹುಂಡಿಗಳಲ್ಲಿ ಹೆಚ್ಚಿನ ಹಣ ಸಂಗ್ರಹವಾಗಿದೆ’ ಎಂದು ದೇವಾಲಯದ ಎ.ಇ.ಒ ವೆಂಕಟೇಶ್ ಪ್ರಸಾದ್ ತಿಳಿಸಿದರು.