ರಾತ್ರಿ ಕರ್ಫ್ಯೂ ಉಲ್ಲಂಘನೆ: 318 ವಾಹನಗಳ ಜಪ್ತಿ

ಬೆಂಗಳೂರು: ಡಿಸೆಂಬರ್‌ 28ರಿಂದ 31ರ ಅವಧಿಯಲ್ಲಿ ರಾತ್ರಿ ಕರ್ಫ್ಯೂ ಉಲ್ಲಂಘಿಸಿ ರಸ್ತೆಗಿಳಿದಿದ್ದ ಒಟ್ಟು 318 ವಾಹನಗಳನ್ನು ನಗರ ಪೊಲೀಸರು ಜಪ್ತಿ ಮಾಡಿದ್ದಾರೆ.

ಡಿಸೆಂಬರ್‌ 31ರ ರಾತ್ರಿ 26 ದ್ವಿಚಕ್ರ ವಾಹನ ಸೇರಿ ಒಟ್ಟು 31 ವಾಹನಗಳನ್ನು ಜಪ್ತಿ ಮಾಡಲಾಗಿದೆ.

‘ರಾತ್ರಿ ಕರ್ಫ್ಯೂ ಜಾರಿಯಾದ ದಿನದಿಂದ ಈವರೆಗೆ 280 ದ್ವಿಚಕ್ರ ವಾಹನಗಳು, 10 ಆಟೊ ಹಾಗೂ 28 ಕಾರುಗಳನ್ನು ವಶಕ್ಕೆ ಪಡೆಯಲಾಗಿದೆ. ಈಶಾನ್ಯ ವಿಭಾಗದಲ್ಲಿ 48 ದ್ವಿಚಕ್ರವಾಹನ ಸೇರಿ ಒಟ್ಟು 57, ಪಶ್ಚಿಮ ವಿಭಾಗದಲ್ಲಿ 104 ದ್ವಿಚಕ್ರವಾಹನ ಸೇರಿ ಒಟ್ಟು 113, ಉತ್ತರ ವಿಭಾಗದಲ್ಲಿ 12, ಕೇಂದ್ರ ವಿಭಾಗದಲ್ಲಿ 116 ದ್ವಿಚಕ್ರವಾಹನ ಸೇರಿದಂತೆ ಒಟ್ಟು 136 ವಾಹನಗಳನ್ನು ಜಪ್ತಿ ಮಾಡಲಾಗಿದೆ’ ಎಂದು ಪೊಲೀಸರು ತಿಳಿಸಿದ್ದಾರೆ.

‘ಸಾರ್ವಜನಿಕ ಸ್ಥಳಗಳಲ್ಲಿ ಹೊಸ ವರ್ಷಾಚರಣೆ ನಿರ್ಬಂಧಿಸುವ ಸಲುವಾಗಿ ನಗರದ ಎಲ್ಲೆಡೆ ಬಿಗಿ ಭದ್ರತೆ ಕೈಗೊಳ್ಳಲಾಗಿತ್ತು. 500ಕ್ಕೂ ಅಧಿಕ ಸ್ಥಳಗಳಲ್ಲಿ ಬ್ಯಾರಿಕೇಡ್‌ಗಳನ್ನು ಹಾಕಿ ಪ್ರಮುಖ ರಸ್ತೆಗಳಲ್ಲಿ ವಾಹನ ಸಂಚಾರ ಬಂದ್‌ ಮಾಡಲಾಗಿತ್ತು’ ಎಂದು ಹೇಳಿದ್ದಾರೆ.