ಚುನಾವಣಾ ಆಯೋಗ ಎದುರು ಪ್ರತಿಭಟನೆ: ದೂರು

ಬೆಂಗಳೂರು: ಶೇಷಾದ್ರಿ ರಸ್ತೆಯಲ್ಲಿರುವ ಚುನಾವಣಾ ಆಯೋಗದ ಎದುರು ಪ್ರತಿಭಟನೆ ನಡೆಸಿ,
‘ಮಾದರಿ ನೀತಿಸಂಹಿತೆ ನೋಡಲ್‌ ಅಧಿಕಾರಿಗಳು ಆಡಳಿತರೂಢ ಬಿಜೆಪಿಯ ಏಜೆಂಟರು’ ಎಂದು ಆರೋಪಿಸಿದ ಸುಮಾರು 50 ಕಾಂಗ್ರೆಸ್‌ ಕಾರ್ಯಕರ್ತರ ವಿರುದ್ಧ ದೂರು ದಾಖಲಾಗಿದೆ.

ಮಾದರಿ ನೀತಿಸಂಹಿತೆ ನೋಡಲ್‌ ಅಧಿಕಾರಿ ಜಯಸಿಂಹ ಅವರು ನೀಡಿದ ದೂರಿನ ಆಧಾರದಲ್ಲಿ ಹಲಸೂರುಗೇಟ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

‘ಪ್ರತಿಭಟನೆ ನಡೆಸುವ ಬಗ್ಗೆ ಪ್ರತಿಭಟನೆಕಾರರು ಮೊದಲೇ ಅನುಮತಿ ಪಡೆದಿರಲಿಲ್ಲ. ಇದು ಮಾದರಿ ನೀತಿ ಸಂಹಿತೆ ಉಲ್ಲಂಘನೆಯಾಗಿದೆ. ಸಿಸಿಟಿವಿ ಕ್ಯಾಮೆರಾ ಪರಿಶೀಲಿಸಿ, ಪ್ರತಿಭಟನಕಾರರ ಗುರುತು ಪತ್ತೆ ಮಾಡಲಾಗುವುದು’ ಎಂದು ಪೊಲೀಸರು ತಿಳಿಸಿದರು.