ಭಕ್ತರಿಗೆ ದೂರದಿಂದಲೇ ಸಿದ್ಧಗಂಗಾಶ್ರೀ ದರ್ಶನಕ್ಕೆ ಅವಕಾಶ

ತುಮಕೂರು: ಹಳೇಮಠದಲ್ಲಿ ಕೊಠಡಿಯಲ್ಲಿರುವ ಡಾ.ಶಿವಕುಮಾರ ಸ್ವಾಮೀಜಿ ಅವರನ್ನು ದೂರದಿಂದಲೇ ದರ್ಶನ ಮಾಡಲು ಬುಧವಾರ ಸಂಜೆ ಅವಕಾಶ ಮಾಡಿಕೊಡಲಾಯಿತು.

ಬೆಳಿಗ್ಗೆಯಿಂದಲೇ ಭಕ್ತರು, ಮಠದ ವಿದ್ಯಾರ್ಥಿಗಳು, ಸಿಬ್ಬಂದಿ ಸ್ವಾಮೀಜಿ ದರ್ಶನಕ್ಕೆ ಕಾದಿದ್ದರು. ಸಂಜೆ ಭಕ್ತರ ಮನವಿ, ಅವರ ಸಂಖ್ಯೆ ಹೆಚ್ಚಾದಾಗ ಹಳೇ ಮಠದ ಹಿಂಭಾಗದಲ್ಲಿರುವ ಕಿಟಕಿ ಮೂಲಕ ಸ್ವಾಮೀಜಿ ಅವರನ್ನು ದೂರದಿಂದಲೇ ದರ್ಶನ ಮಾಡಲು ಅವಕಾಶ ಕೊಡಲಾಯಿತು.

ಭಕ್ತರೂ ನೂಕುನುಗ್ಗಲಿಗೆ ಅವಕಾಶ ಕೊಡದೇ ಸಾಲುಗಟ್ಟಿ ನಿಂತು ದರ್ಶನ ಪಡೆದರು. ಡಿಸೆಂಬರ್‌ 2ರಂದು ಸ್ವಾಮೀಜಿ ತೀವ್ರ ಅನಾರೋಗ್ಯಕ್ಕೀಡಾದ ಬಳಿಕ ಮಠದಲ್ಲಿ ಸ್ವಾಮೀಜಿ ಅವರ ದರ್ಶನ ಭಾಗ್ಯ ಭಕ್ತರಿಗೆ ಲಭಿಸಿರಲಿಲ್ಲ. ಬುಧವಾರ ಸಂಜೆ ಮತ್ತೆ ಈ ದರ್ಶನ ವ್ಯವಸ್ಥೆಯಾಗಿದೆ.