ಅಧ್ಯಾಪಕರ ವೇತನ ಹೆಚ್ಚಳ

ಬೆಂಗಳೂರು: ವಿಶ್ವವಿದ್ಯಾಲಯಗಳು ಹಾಗೂ ಕಾಲೇಜು ಅಧ್ಯಾಪಕ, ಪ್ರಾಧ್ಯಾಪಕರಿಗೆ ಕೇಂದ್ರ ಸರ್ಕಾರದ ಏಳನೇ ವೇತನ ಆಯೋಗದ ಅನ್ವಯ ವೇತನ ಪರಿಷ್ಕರಿಸಿ ರಾಜ್ಯ ಸರ್ಕಾರ ಇದೇ 16ರಂದು ಆದೇಶ ಹೊರಡಿಸಲಿದೆ.

2016ರ ಜನವರಿ 1ರಿಂದ ಪೂರ್ವಾನ್ವಯವಾಗುವಂತೆ ತುಟ್ಟಿಭತ್ಯೆ, ಮನೆಬಾಡಿಗೆ ಭತ್ಯೆಯನ್ನೂ ನೀಡಲಾಗುವುದು ಎಂದು ಆದೇಶದಲ್ಲಿ ತಿಳಿಸಲಾಗಿದೆ.

ಎಲ್ಲ ಹಂತಗಳ ಪ್ರಾಧ್ಯಾಪಕರ ಮೂಲವೇತನವನ್ನು ಪರಿಷ್ಕರಣೆ ಮಾಡಲಾಗಿದೆ.

ಸಹಾಯಕ ಪ್ರಾಧ್ಯಾಪಕರ ವೇತನ ಶ್ರೇಣಿಯು ₹57,700ರಿಂದ ₹1,82,400, ಹಿರಿಯ ಸಹಾಯಕ ಪ್ರಾಧ್ಯಾಪಕರ ವೇತನ ಶ್ರೇಣಿಯು ₹68,900ರಿಂದ ₹2,05,000, ಆಯ್ಕೆ ಶ್ರೇಣಿಯ ಸಹಾಯಕ ಪ್ರಾಧ್ಯಾಪಕರ ವೇತನ ಶ್ರೇಣಿಯು ₹79,800ರಿಂದ ₹2,11,500ಕ್ಕೆ ನಿಗದಿಯಾಗಿದೆ.

ಸಹ ಪ್ರಾಧ್ಯಾಪಕರ ವೇತನ ಶ್ರೇಣಿಯು ₹1,31,400ರಿಂದ ₹2,17,100, ಪ್ರಾಧ್ಯಾಪಕರ ವೇತನ ಶ್ರೇಣಿಯು ₹1,44,200ರಿಂದ ₹2,18,200 ಹಾಗೂ ಹಿರಿಯ ಪ್ರಾಧ್ಯಾಪಕರ ವೇತನ ಶ್ರೇಣಿಯು ₹1,82,200ರಿಂದ ₹2,24,100ರವರೆಗೆ ಇರಲಿದೆ.

ಪರಿಷ್ಕೃತ ವೇತನ ಏಪ್ರಿಲ್‌ 1 ರರಿಂದ ಅನ್ವಯವಾಗಲಿದೆ ಎಂದು ಕರ್ನಾಟಕ ಸರ್ಕಾರಿ ಕಾಲೇಜು ಅಧ್ಯಾಪಕರ ಸಂಫದ ಟಿ.ಎಂ.ಮಂಜುನಾಥ್‌ ಹೇಳಿದ್ದಾರೆ.