`ಡ್ರೋಣ್ ದಾಳಿ ಒಪ್ಪಿಕೊಳ್ಳಲಾಗದು'

ಇಸ್ಲಾಮಾಬಾದ್(ಐಎಎನ್‌ಎಸ್/ ಪಿಟಿಐ):  ಪಾಕಿಸ್ತಾನದ ಬುಡಕಟ್ಟು ಪ್ರಾಂತ್ಯದ ಮೇಲೆ ಅಮೆರಿಕ ನಡೆಸುತ್ತಿರುವ ಡ್ರೋಣ್ ದಾಳಿಯನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ ಎಂದು ಪಾಕಿಸ್ತಾನದ ಪ್ರಧಾನಿ ನವಾಜ್ ಷರೀಫ್ ಹೇಳಿದ್ದಾರೆ.

ಡ್ರೋಣ್ ದಾಳಿಯನ್ನು ಕೂಡಲೇ ನಿಲ್ಲಿಸಬೇಕು. ಈ ಬಗ್ಗೆ ಹಲವು ಬಾರಿ ಪ್ರತಿಭಟನೆ ನಡೆಸಿದ್ದೆವು. ದಾಳಿ ಮೂಲಕ ಪಾಕ್‌ನ ಸಾರ್ವಭೌಮತ್ವ ಹಾಗೂ ಅಂತರರಾಷ್ಟ್ರೀಯ ಕಾನೂನನ್ನು ಅಮೆರಿಕ  ಉಲ್ಲಂಘನೆ ಮಾಡಿದೆ ಎಂದು ಜರ್ಮನಿ ವಿದೇಶಾಂಗ ಸಚಿವ ಗೀಡೊ ವೆಸ್ಟರ್‌ವೆಲ್ಲೆ  ಅವರೊಂದಿಗಿನ ಮಾತುಕತೆಯಲ್ಲಿ ಷರೀಫ್ ಹೇಳಿರುವುದಾಗಿ `ಡಾನ್' ನ್ಯೂಸ್ ವರದಿ ಮಾಡಿದೆ.

ಆಫ್ಘಾನಿಸ್ತಾನದಲ್ಲಿ ಸೇನೆಯನ್ನು ಹಿಂದಕ್ಕೆ ಕರೆಸಿಕೊಳ್ಳಲು ತಾವು ನೆರವಾಗುವುದಾಗಿಯೂ ಹೇಳಿರುವ ಷರೀಫ್, ಅಫ್ಘನ್ ಸೇನೆ ಹಾಗೂ ಭದ್ರತಾ ಪಡೆಗಳು ಅಲ್ಲಿನ ಪರಿಸ್ಥಿತಿ ನಿಯಂತ್ರಿಸಲು ಶಕ್ತವಿರುವುದಾಗಿ ತಿಳಿಸಿದ್ದಾರೆ.