ನೇಪಾಳ: ಭಾರತದ ಅಧಿಕಮುಖಬೆಲೆ ನೋಟಿಗೆ ನಿಷೇಧ

ಕಠ್ಮಂಡು: ಭಾರತದ ₹2,000, ₹500 ಮತ್ತು ₹200 ಮುಖಬೆಲೆಯ ನೋಟುಗಳ ಬಳಕೆಯನ್ನು ನೇಪಾಳ ಸರ್ಕಾರ ನಿಷೇಧಿಸಿದೆ.

ಭಾರತದ ₹100 ಮುಖಬೆಲೆಗಿಂತ ಹೆಚ್ಚಿನ ಮೌಲ್ಯದ ನೋಟುಗಳನ್ನು ಇಟ್ಟುಕೊಳ್ಳಬಾರದು ಮತ್ತು ಚಲಾವಣೆ ಮಾಡಬಾರದು ಎಂದು ಸರ್ಕಾರ ಜನರಿಗೆ ತಿಳಿಸಿದೆ. ‘ಈ ನೋಟುಗಳಿಗೆ ಕಾನೂನಿನ ಮಾನ್ಯತೆ ಇಲ್ಲ’ ಎಂದು ಮಾಹಿತಿ ಮತ್ತು ಸಂವಹನ ಸಚಿವ ಗೋಕುಲ್‌ ಪ್ರಸಾದ್‌ ಬಸ್ಕೋಟ ಅವರು ಹೇಳಿರುವುದನ್ನು ಉಲ್ಲೇಖಿಸಿ ‘ಕಠ್ಮಂಡು ಪೋಸ್ಟ್‌’ ಪತ್ರಿಕೆ ವರದಿ ಮಾಡಿದೆ.

ಈ ಕ್ರಮದಿಂದ, ಭಾರತದಲ್ಲಿ ಕೆಲಸ ಮಾಡುವ ನೇಪಾಳದ ಕಾರ್ಮಿಕರು ಮತ್ತು ನೇಪಾಳಕ್ಕೆ ಪ್ರವಾಸ ತೆರಳುವ ಭಾರತೀಯರಿಗೆ ತೊಂದರೆಯಾಗಲಿದೆ.

ಭಾರತ ಸರ್ಕಾರವು 2016ರಲ್ಲಿ ಅಧಿಕ ಮುಖಬೆಲೆಯ ಹಳೆಯ ನೋಟುಗಳನ್ನು ರದ್ದು ಮಾಡಿದ ನಂತರ, ₹2000 ಮತ್ತು ₹200 ಮುಖಬೆಲೆಯ ನೋಟುಗಳನ್ನು ಪರಿಚಯಿಸಿತ್ತು. ₹500ರ ಹೊಸ ನೋಟು ಸಹ ಚಲಾವಣೆಯಲ್ಲಿದೆ.