ಪಾಕ್‌ನಲ್ಲಿನ ಗುರುತು ಬಹಿರಂಗ: ಅಮೆರಿಕದ ಅಧಿಕಾರಿ ವಾಪಸ್

ವಾಷಿಂಗ್ಟನ್ (ಪಿಟಿಐ): ಪಾಕಿಸ್ತಾನದ ಬೇಹುಗಾರಿಕಾ ಸಂಸ್ಥೆ ಐಎಸ್‌ಐ ತನ್ನ ದೇಶದಲ್ಲಿದ್ದ ಅಮೆರಿಕದ ಗುಪ್ತಚರ ಸಂಸ್ಥೆ ಮುಖ್ಯಸ್ಥರ ಹೆಸರು ಬಹಿರಂಗ ಮಾಡಿದ್ದ ಹಿನ್ನೆಲೆಯಲ್ಲಿ ಆ ಅಧಿಕಾರಿಯನ್ನು ವಾಷಿಂಗ್ಟನ್ ವಾಪಸ್ ಕರೆಸಿಕೊಂಡಿದೆ. ಸಿಐಎ ಸ್ಥಾನೀಯ ಅಧಿಕಾರಿ ಜೋನಾಥನ್ ಬ್ಯಾಂಕ್ಸ್ ಅವರ ಹೆಸರು ಪಾಕಿಸ್ತಾನದ ಮಾಧ್ಯಮಗಳಲ್ಲಿ ಇತ್ತೀಚೆಗೆ ಬಹಿರಂಗಗೊಂಡಿತ್ತು. ಆಗಿನಿಂದ ಅವರಿಗೆ ಪ್ರಾಣ ಬೆದರಿಕೆ ಎದುರಾಗಿತ್ತು.

ಇದೊಂದು ‘ಮಹತ್ವದ ಗೋಪ್ಯತೆ ಸೋರಿಕೆ’ ಎಂದು ಪರಿಗಣಿಸಲಾಗಿದೆ.ಈ ಹಿಂದೆ ಅಮೆರಿಕದಲ್ಲಿದ್ದ ಐಎಸ್‌ಐ ಮುಖ್ಯಸ್ಥ ಅಹಮದ್ ಶುಜಾ ಪಾಷಾ ಅವರ ವಿರುದ್ಧ ಮುಂಬೈ ದಾಳಿಗೆ ಸಂಬಂಧಿಸಿದಂತೆ ನ್ಯೂಯಾರ್ಕ್ ನ್ಯಾಯಾಲಯದಲ್ಲಿ ಮೊಕದ್ದಮೆ ದಾಖಲಾಗಿತ್ತು. ಇದಕ್ಕೆ ಪ್ರತೀಕಾರವಾಗಿ ಐಎಸ್‌ಐ ಈ ಕ್ರಮ ಕೈಗೊಂಡಿದೆ ಎಂದು ಅವೆುರಿಕದ ಅಧಿಕಾರಿಗಳು ತಿಳಿಸಿದ್ದಾರೆ. ಪಾಕ್‌ನಲ್ಲಿರುವ ಉಗ್ರರ ಅಡಗುತಾಣಗಳ ಮೇಲೆ ದಾಳಿ ಆಗಬೇಕು ಎಂದು ಅಮೆರಿಕದ ಅಧ್ಯಕ್ಷ ಬರಾಕ್ ಒಬಾಮ ಅವರು ಎಚ್ಚರಿಸಿದ ಬೆನ್ನಲ್ಲೇ ಈ ಘಟನೆ ನಡೆದಿದೆ.