ವಿಜ್ಞಾನಿಗಳಿಂದ ಹೊಸ ನಕ್ಷತ್ರ ಪುಂಜ ಪತ್ತೆ

ವಾಷಿಂಗ್ಟನ್(ಪಿಟಿಐ): ಮಹಾಸ್ಫೋಟ ಸಂಭವಿಸಿದ ಕೋಟ್ಯಂತರ ವರ್ಷಗಳ ನಂತರ ಬಾಹ್ಯಾಕಾಶದಲ್ಲಿ ಸೃಷ್ಟಿಯಾದ ಏಳು ಹೊಸ ನಕ್ಷತ್ರ ಪುಂಜಗಳನ್ನು ಅಮೆರಿಕದ `ನಾಸಾ' ಖಗೋಳಶಾಸ್ತ್ರಜ್ಞರು ಗುರುತಿಸಿದ್ದಾರೆ.

ಬಾಹ್ಯಾಕಾಶವನ್ನು ಅತ್ಯಂತ ಆಳವಾಗಿ ಗಮನಿಸಿ, ಇಲ್ಲಿಯವರೆವಿಗೆ ಯಾರೂ ಗುರುತಿಸದ ಏಳು ನಕ್ಷತ್ರ ಪುಂಜಗಳನ್ನು ಪತ್ತೆ ಮಾಡಿರುವುದಾಗಿ ವಿಜ್ಞಾನಿಗಳು ಹೇಳಿಕೊಂಡಿದ್ದಾರೆ. ಹದಿಮೂರು ಶತಕೋಟಿ ವರ್ಷಗಳ ಹಿಂದೆ ಸೃಷ್ಟಿಯಾದ ಏಳು ಪ್ರಾಚೀನ ನಕ್ಷತ್ರ ಪುಂಜಗಳನ್ನು ಪತ್ತೆ ಮಾಡಲು ನಾಸಾದ ಹಬ್ಬಲ್ ಬಾಹ್ಯಾಕಾಶ ದೂರದರ್ಶಕವನ್ನು ಬಳಸಿದ್ದಾರೆ.

ನಕ್ಷತ್ರ ಪುಂಜಗಳು ಮೊಟ್ಟ ಮೊದಲು ರೂಪುಗೊಂಡಾಗಿನ ಯುಗ ಹೇಗಿತ್ತು ಎಂಬುದನ್ನು ಈ ಹೊಸ ನಕ್ಷತ್ರ ಪುಂಜಗಳ ಪತ್ತೆಯಿಂದ ತಿಳೀಯಬಹುದಾಗಿದೆ ಎಂದು ನಾಸಾ ಪ್ರಕಟಣೆಯಲ್ಲಿ ತಿಳಿಸಿದೆ.