ಹಿಮಪಾತ: ಪಾಕ್ ಯೋಧರಿಗಾಗಿ ಹುಡುಕಾಟ ತೀವ್ರ

ಇಸ್ಲಾಮಾಬಾದ್ (ಪಿಟಿಐ): ಪ್ರತಿಕೂಲ ಹವಾಮಾನದ ವಿರುದ್ಧ ಸೆಣಸಾಟಕ್ಕೆ ಇಳಿದಿರುವ ಪಾಕಿಸ್ತಾನಿ ಪಡೆಗಳು ಶ್ವಾನಗಳು ಮತ್ತು ಯಾಂತ್ರಿಕ  ಉಪಕರಣಗಳ ನೆರವಿನೊಂದಿಗೆ ಭಾರತದ ಗಡಿ ಸಮೀಪದ ಸಿಯಾಚಿನ್ ಪ್ರದೇಶದಲ್ಲಿ ಹಿಮದಡಿಯಲ್ಲಿ ಸಿಲುಕಿರುವ 135 ಜನರಿಗಾಗಿ ತೀವ್ರ ಶೋಧ ಕಾರ್ಯಾಚರಣೆ ಮುಂದುವರೆಸಿದೆ.
 
ಭಾರಿ ಹಿಮಪಾತದ ಪರಿಣಾಮವಾಗಿ 135ಕ್ಕೂ ಹೆಚ್ಚು ಯೋಧರು ಸಿಯಾಚಿನ್ ಪ್ರದೇಶದಲ್ಲಿ ಹಿಮ ಶನಿವಾರ ಸಮಾಧಿಯಾಗಿದ್ದಾರೆ.

ಶನಿವಾರ ತಡರಾತ್ರಿ ಕತ್ತಲಿನ ಪರಿಣಾಮವಾಗಿ ಸ್ಥಗಿತಗೊಳಿಸಲಾಗಿದ್ದ ಶೋಧ ಕಾರ್ಯಾಚರಣೆಯನ್ನು ಭಾನುವಾರ ಬೆಳಗ್ಗೆ ಪುನರಾರಂಭಿಸಲಾಗಿದೆ.

ಹಿಮಪಾತದ ಘಟನೆಯಲ್ಲಿ ಬದುಕಿ ಉಳಿದವರ ಬಗ್ಗೆ ಈವರೆಗೂ ಯಾವುದೇ ಸುಳಿವುಗಳೂ ಲಭಿಸಿಲ್ಲ ಎಂದು ಸೇನಾಧಿಕಾರಿಗಳು ಮಾಧ್ಯಮಕ್ಕೆ ತಿಳಿಸಿದರು.

ಈ ಮಧ್ಯೆ ಸೇನಾ ದಂಡನಾಯಕ ಜನರಲ್ ಅಶ್ಫಾಕ್ ಪರ್ವೇಜ್ ಕಯಾನಿ ಅವರು ರಕ್ಷಣಾ ಕಾರ್ಯಾಚರಣೆಯ ಸ್ವಯಂ ಉಸ್ತುವಾರಿಗಾಗಿ ಸ್ಕರ್ಡು ಪ್ರದೇಶಕ್ಕೆ ತೆರಳಿದ್ದಾರೆ.