ಭೀಕರ ಕಾಲ್ತುಳಿತಕ್ಕೆ 153 ಜನ ಸಾವು: ಭೂತದ ವೇಷ ಹಾಕಿದವರೇ ಉಸಿರುಗಟ್ಟಿದರು!

ಸೋಲ್: ದಕ್ಷಿಣ ಕೊರಿಯಾದ ರಾಜಧಾನಿಸೋಲ್‌ನಲ್ಲಿ ಹಾಲೋವಿನ್ ಉತ್ಸವದ ವೇಳೆ ಸಂಭವಿಸಿದ ಭೀಕರ ಕಾಲ್ತುಳಿತದಲ್ಲಿ ಮೃತಪಟ್ಟವರ ಸಂಖ್ಯೆ 153 ಕ್ಕೆ ಏರಿದೆ.

ಘಟನೆಯಲ್ಲಿ 82 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದು 19 ಜನರ ಸ್ಥಿತಿ ಗಂಭೀರವಾಗಿದೆ. ಪರಿಹಾರ ಕಾರ್ಯಾಚರಣೆ ತಂಡ ಸ್ಥಳದಲ್ಲಿ ಬೀಡು ಬಿಟ್ಟಿದ್ದು ರಾಷ್ಟ್ರದಾದ್ಯಂತ ಶೋಕಾಚರಣೆ ಘೋಷಿಸಲಾಗಿದೆ.

ಮೃತಪಟ್ಟವರಲ್ಲಿ ಬಹುತೇಕರು ಯುವಕ ಯುವತಿಯರೇ ಆಗಿದ್ದು, 19–20 ರ ವಯೋಮಾನದವರಾಗಿದ್ದಾರೆ.

ಆಗಿದ್ದೇನು?

ನೈಟ್ ಲೈಫ್‌ಗೆ ಹೆಸರಾದ ಸಿಯೋಲ್‌ನ ಇಟಾವನ್ ಪ್ರದೇಶದಲ್ಲಿ ಭಾನುವಾರ ರಾತ್ರಿ ಹಾಲೋವಿನ್ ಆಚರಣೆ ವೇಳೆ ಸೇರಿದ್ದ ಲಕ್ಷಾಂತರ ಜನ ಸಂಭ್ರಮಾಚರಣೆಯಲ್ಲಿದ್ದರು. ಇಟಾವನ್ ಪ್ರದೇಶದ ಕೇಲವ 4 ಮೀಟರ್ ಅಗಲವಾದ ರಸ್ತೆಗಳಲ್ಲಿ ಲಕ್ಷಾಂತರ ಜನ ಜಮಾವಣೆ ಆಗಿದ್ದರು.

ಈ ವೇಳೆ ಕೆಲವರು ತಳ್ಳಾಟ ನಡೆಸಿದ್ದಾರೆ. ತಳ್ಳಾಟದಿಂದ ಭಾರಿ ನೂಕು ನುಗ್ಗಲು ಸಂಭವಿಸಿದೆ. ಈ ವೇಳೆ ಅಶಕ್ತರು ಹಾಗೂ ಯುವಕ ಯುವತಿಯರು ಕಾಲ್ತುಳಿಕ್ಕೆ ಸಿಲುಕಿದ್ದಾರೆ. ಕಾಲ್ತುಳಿತ ಸಂಭವಿಸಿದಾಗ ಉಸಿರುಗಟ್ಟಿ ಬಹುತೇಕರು ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ ಎಂದು ಸ್ಥಳೀಯ ಪೊಲೀಸರು ತಿಳಿಸಿದ್ದಾರೆ.‌

ಉಸಿರುಗಟ್ಟಲು ಪ್ರಮುಖ ಕಾರಣ ಹಾಲೋವಿನ್ ಆಚರಣೆಗಾಗಿ ಅನೇಕರು ಭೂತದ ವೇಷಗಳನ್ನು ಹಾಕಿಕೊಂಡಿದ್ದರು. ಹೀಗೆ ಬಿಗಿಯಾದ ವೇಷಗಳನ್ನು ಹಾಕಿಕೊಂಡವರು ಕಾಲ್ತುಳಿತಕ್ಕೆ ಸಿಲುಕಿ ಉಸಿರುಟ್ಟಿ ಮೃತಪಟ್ಟಿದ್ದಾರೆ.

ಮೃತರ ಶವಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದ್ದು ಸಿಯೋಲ್‌ನ ಬೀದಿ ಬೀದಿಗಳಲ್ಲಿ ಮೌನ ಆವರಿಸಿದೆ. ಆಸ್ಪತ್ರೆಗಳಲ್ಲಿ ಮೃತರ ಸಂಬಂಧಿಕರ ಆಕ್ರಂದನ ಮುಗಿಲು ಮುಟ್ಟಿದೆ ಎಂದು ದಕ್ಷಿಣ ಕೊರಿಯಾದ ಯೊನ್‌ಹಾಫ್‌ ಸುದ್ದಿಸಂಸ್ಥೆ ವರದಿ ಮಾಡಿದೆ.

ಕೋವಿಡ್ ನಂತರ ಮೂರು ವರ್ಷಗಳ ತರುವಾಯ ಸಿಯೊಲ್‌ನಲ್ಲಿ ಆಚರಿಸಲಾಗುತ್ತಿದ್ದ ಹಾಲೋವಿನ್ ಆಚರಣೆ ಇದಾಗಿತ್ತು. ಮೃತರಲ್ಲಿ 22 ಜನ ವಿದೇಶಿಗರು ಎಂದು ತಿಳಿದು ಬಂದಿದೆ.

ಘಟನೆ ಬಗ್ಗೆ ದಕ್ಷಿಣ ಕೊರಿಯಾ ಅಧ್ಯಕ್ಷ ಯೂನ್ ಸುಕ್ ಯೊಲ್ ಅವರು ತೀವ್ರ ಆಘಾತ ವ್ಯಕ್ತಪಡಿಸಿದ್ದು, ಇಂತಹ ದುರಂತ ಸಂಭವಿಸಬಾರದಿತ್ತು ಎಂದು ಸಂತಾಪ ಸೂಚಿಸಿದ್ದಾರೆ. ಮೃತರಿಗೆ ಅಮೆರಿಕ ಅಧ್ಯಕ್ಷ ಜೊ ಬೈಡೆನ್ ಸೇರಿದಂತೆ ಅನೇಕ ಜಾಗತಿಕ ನಾಯಕರು ಸಂತಾಪ ಸೂಚಿಸಿದ್ದಾರೆ.

ದೊಡ್ಡ ದುರಂತ

2014 ರಿಂದ ಇತ್ತೀಚೆಗೆ ದಕ್ಷಿಣ ಕೊರಿಯಾದಲ್ಲಿ ಸಂಭವಿಸಿದ ಅತಿದೊಡ್ಡ ದುರಂತ ಇದಾಗಿದೆ. 2014 ರಲ್ಲಿ ಸಂಭವಿಸಿದ್ದ ದೋಣಿ ದುರಂತದಲ್ಲಿ 304 ಜನ ಮೃತಪಟ್ಟಿದ್ದರು.