ಇಡಾ ಚಂಡಮಾರುತದಿಂದ ಅಮೆರಿಕದ ನ್ಯೂಜೆರ್ಸಿಯಲ್ಲಿ ಪ್ರವಾಹ: ಭಾರತದ ಇಬ್ಬರು ನಾಪತ್ತೆ

ನ್ಯೂಯಾರ್ಕ್: ಅಮೆರಿಕದ ನ್ಯೂಜೆರ್ಸಿಯಲ್ಲಿ ಇಡಾ ಚಂಡಮಾರುತದಿಂದ ಸಂಭವಿಸಿದ ಭಾರಿ ಪ್ರವಾಹದಲ್ಲಿ ಭಾರತೀಯ ಸಂಜಾತರಾದ ಇಬ್ಬರು ನಾಪತ್ತೆಯಾಗಿದ್ದಾರೆ. ಇವರ ಪತ್ತೆಗೆ ಡ್ರೋನ್‌ ಮತ್ತು ಬೋಟ್‌ಗಳ ಮೂಲಕ ಶೋಧ ಕಾರ್ಯಾಚರಣೆ ಕೈಗೊಳ್ಳಲಾಗಿದೆ.

ನಿಧಿ ರಾಣಾ (18) ಮತ್ತು ಆಯುಷ್‌ ರಾಣಾ (21) ನಾಪತ್ತೆಯಾದವರು. ಆಯುಷ್‌ ಅವರ ಕಾರು ಬುಧವಾರ ಪ್ರವಾಹದಲ್ಲಿ ಸಿಲುಕಿಕೊಂಡಿತ್ತು. ಅವರು ಕಾಣಿಸಿಕೊಂಡಿದ್ದು ಅದೇ ಕೊನೆ ದಿನ ಎಂದು ‘ನಾರ್ಥಜೆರ್ಸಿ.ಕಾಮ್‌’ ವರದಿ ಮಾಡಿದೆ.

‘ಎರಡು ಬೋಟ್‌ಗಳು ಮತ್ತು ಮೂರು ಡ್ರೋನ್‌ಗಳನ್ನು ಶೋಧ ಕಾರ್ಯಾಚರಣೆಗೆ ಬಳಸಲಾಗಿದೆ. ರಕ್ಷಣಾ ತಂಡಗಳು ಮೋರಿಯಲ್ಲೂ ಶೋಧ ನಡೆಸಿವೆ’ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಚಂಡಮಾರುತದಿಂದಾಗಿ ಇದುವರೆಗೆ 40ಕ್ಕೂ ಹೆಚ್ಚು ಮಂದಿ ಸಾವಿಗೀಡಾಗಿದ್ದಾರೆ. ಭಾರತ ಸಂಜಾತರಾದ ಮಾಲತಿ ಕಾಂಚೆ (45) ಹಾಗೂ ಧನುಷ್‌ ರೆಡ್ಡಿ (31) ಎಂದು ಇತ್ತೀಚೆಗೆ ಸಾವಿಗೀಡಾಗಿದ್ದರು.