ಲಂಡನ್ (ಪಿಟಿಐ): ಭಾರತದ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಪ್ರಧಾನಿ ಬೋರಿಸ್ ಜಾನ್ಸನ್ ಹಸ್ತಲಾಘವ ಮಾಡುತ್ತಿದ್ದ ಚಿತ್ರವನ್ನು ಒಳಗೊಂಡ ಕರಪತ್ರ ಹಾಗೂ ಅದರಲ್ಲಿ ಮುದ್ರಿತ ವಿಷಯ ಬ್ರಿಟನ್ನ ಸಂಸತ್ನಲ್ಲಿ ಕಾವೇರಿದ ಚರ್ಚೆ ಹಾಗೂ ಗದ್ದಲಕ್ಕೆ ಕಾರಣವಾಯಿತು.
ಈ ವಿಷಯವಾಗಿ ಪ್ರಧಾನಿ ಜಾನ್ಸನ್ ಹಾಗೂ ವಿರೋಧ ಪಕ್ಷದ ನಾಯಕ ಕೀರ್ ಸ್ಟಾರ್ಮರ್ ನಡುವೆ ಆರಂಭವಾದ ಮಾತಿನ ಚಕಮಕಿ ಒಂದು ಹಂತದಲ್ಲಿ ವಿಕೋಪಕ್ಕೆ ಹೋಗಿ, ಗದ್ದಲಕ್ಕೂ ಕಾರಣವಾಯಿತು.
ಬ್ಯಾಟ್ಲೆ–ಸ್ಪೆನ್ ಕ್ಷೇತ್ರಕ್ಕೆ ಇತ್ತೀಚೆಗೆ ನಡೆದ ಉಪಚುನಾವಣೆಯಲ್ಲಿ ಈ ಕರಪತ್ರವನ್ನು ಹಂಚಲಾಗಿತ್ತು. 2019ರಲ್ಲಿ ನಡೆದ ಜಿ–7 ಶೃಂಗಸಭೆಯಲ್ಲಿ ಮೋದಿ ಹಾಗೂ ಜಾನ್ಸನ್ ಅವರು ಭೇಟಿಯಾಗಿದ್ದಾಗ, ಉಭಯ ನಾಯಕರು ಹಸ್ತಲಾಘವ ಮಾಡಿದ್ದ ಚಿತ್ರವನ್ನು ಈ ಕರಪತ್ರದಲ್ಲಿ ಮುದ್ರಿಸಲಾಗಿತ್ತು. ಭಾರತೀಯರನ್ನು ಅವಹೇಳನ ಮಾಡುವ ವಾಕ್ಯಗಳನ್ನು ಕರಪತ್ರದಲ್ಲಿ ಮುದ್ರಿಸಲಾಗಿತ್ತು.
ಈ ಕರಪತ್ರದ ಬಗ್ಗೆ ಆಗ ಬ್ರಿಟನ್ನಲ್ಲಿ ಭಾರಿ ಅಸಮಾಧಾನ ವ್ಯಕ್ತವಾಗಿತ್ತು. ಅದರಲ್ಲೂ ಅಲ್ಲಿನ ಭಾರತೀಯರು ಕರಪತ್ರದಲ್ಲಿನ ವಿಷಯವನ್ನು ಖಂಡಿಸಿದ್ದರು.
ಬ್ರಿಟನ್ನಲ್ಲಿರುವ ಭಾರತೀಯರನ್ನು ವಿರೋಧಿಸುವ ಮನಸ್ಥಿತಿ ಹಾಗೂ ಜನರಲ್ಲಿ ಒಡಕನ್ನುಂಟು ಮಾಡುವ ತಮ್ಮ ಮನೋಭಾವವನ್ನು ಲೇಬರ್ ಪಾರ್ಟಿ ಮುಖಂಡರು ಈ ಕರಪತ್ರದ ಮೂಲಕ ಹೊರಹಾಕಿದ್ದಾರೆ ಎಂದು ಜಾನ್ಸನ್ ದೂರಿದರು.
‘ಲೇಬರ್ ಪಾರ್ಟಿ ಮುಖಂಡರು ಈ ಕರಪತ್ರವನ್ನು ಹಿಂಪಡೆದುಕೊಳ್ಳಬೇಕು’ ಎಂದು ಜಾನ್ಸನ್ ಆಗ್ರಹಿಸಿದರು.
ಈ ಮಾತಿಗೆ ಒಪ್ಪದ ವಿರೋಧ ಪಕ್ಷದ ನಾಯಕ ಸ್ಟಾರ್ಮರ್, ‘ಬ್ರಿಟನ್ನ ಫುಟ್ಬಾಲ್ ಆಟಗಾರರ ವಿರುದ್ಧ ಕೇಳಿ ಬಂದ ಜನಾಂಗೀಯ ನಿಂದನೆಯ ವಿರುದ್ಧ ಆಡಳಿತಾರೂಢ ಕನ್ಸರ್ವೇಟಿವ್ ಪಾರ್ಟಿ ಯಾಕೆ ಹೋರಾಡಲಿಲ್ಲ’ ಎಂದು ಹರಿಹಾಯ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.