US ವಾಯುಸೇನೆ ದಾಳಿ: ಯೆಮನ್‌ನ ಬಂಧನ ಕೇಂದ್ರದಲ್ಲಿದ್ದ ಆಫ್ರಿಕಾದ 68 ವಲಸಿಗರು ಸಾವು

ದುಬೈ: ‘ಆಫ್ರಿಕಾದ ವಲಸಿಗರು ಬಂಧನದಲ್ಲಿದ್ದ ಕೇಂದ್ರದ ಮೇಲೆ ಅಮೆರಿಕದ ವಾಯುಸೇನೆಯು ದಾಳಿ ನಡೆಸಿದ್ದರಿಂದ 68 ಮಂದಿ ಮೃತಪಟ್ಟಿದ್ದು, 47 ಮಂದಿ ಗಾಯಗೊಂಡಿದ್ದಾರೆ’ ಎಂದು ಯೆಮನ್‌ನ ಹೂಥಿ ಬಂಡುಕೋರರು ಸೋಮವಾರ ಆರೋಪಿಸಿದ್ದಾರೆ.

ಈ ಕುರಿತು ಅಮೆರಿಕ ಸೇನೆಯು ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಹೂಥಿಗಳ ಭದ್ರಕೋಟೆಯಾದ ಯೆಮನ್‌ನ ಸಾದಾ ಪಟ್ಟಣದ ಮೇಲೆ ಈ ದಾಳಿ ನಡೆದಿದೆ. ಸೌದಿ ಅರೇಬಿಯಾದಲ್ಲಿ ಕೆಲಸ ಹುಡುಕಿಕೊಂಡು, ಆಫ್ರಿಕಾ ಖಂಡದ ಇಥಿಯೋಪಿಯಾ ದೇಶದ ವಲಸಿಗರು ಯೆಮನ್‌ನ ಮೂಲಕ ದಾಟಿ ಹೋಗುವ ವೇಳೆ ಅವರನ್ನು ಬಂಧಿಸಿ, ಈ ಕೇಂದ್ರದಲ್ಲಿಡಲಾಗಿತ್ತು ಎಂದು ಹೇಳಲಾಗಿದೆ.

ದಾಳಿ ಬಳಿಕ ಕಟ್ಟಡದ ಸುತ್ತಲೂ ದಟ್ಟಣೆಯ ಹೊಗೆ ಆವರಿಸಿತ್ತು.

ದಾಳಿ ನಡೆದ ಜಾಗದಲ್ಲಿ ಮೃತದೇಹಗಳು ಬಿದ್ದಿರುವುದನ್ನು ಹೂಥಿಗಳ ಹಿಡಿತದಲ್ಲಿರುವ ‘ಅಲ್‌–ಮಸಿರಾ’ ಸುದ್ದಿವಾಹಿನಿಯಲ್ಲಿ ತೋರಿಸಲಾಗಿದೆ. ಈ ಜೈಲಿನಲ್ಲಿ 115 ಮಂದಿ ವಲಸಿಗರನ್ನು ಬಂಧಿಸಿಡಲಾಗಿತ್ತು’ ಎಂದು ಹೂಥಿಯ ಆಂತರಿಕ ಸಚಿವಾಲಯವು ತಿಳಿಸಿದೆ.