ಡಿಟಿಪಿ ಲಸಿಕೆ ನೀಡಿಕೆಯಲ್ಲಿ ಭಾರತ ಸೇರಿ ಐದು ದೇಶಗಳು ಹಿಂದೆ: ವಿಶ್ವಸಂಸ್ಥೆ

ವಿಶ್ವಸಂಸ್ಥೆ: ಭಾರತ, ನೈಜೀರಿಯಾ, ಇಂಡೋನೇಷ್ಯಾ, ಇಥಿಯೋಪಿಯಾ ಮತ್ತು ಫಿಲಿಪ್ಪೀನ್ಸ್‌ನಲ್ಲಿ2021ರಲ್ಲಿ ದಾಖಲೆ ಸಂಖ್ಯೆಯ ಮಕ್ಕಳು ಗಂಟಲಮಾರಿ, ಧನುರ್ವಾತ ಮತ್ತು ನಾಯಿ ಕೆಮ್ಮು (ಡಿಟಿಪಿ3) ರೋಗಗಳ ವಿರುದ್ಧದ ಲಸಿಕೆ ಪಡೆದಿಲ್ಲ ಎಂದು ವಿಶ್ವಸಂಸ್ಥೆ ಹೇಳಿದೆ.

ಡಿಟಿಪಿ3 ಮೂರು ಡೋಸ್‌ ಲಸಿಕೆ ಪಡೆದ ಮಕ್ಕಳ ಪ್ರಮಾಣ 2019ರಿಂದ 2021ರ ವರೆಗೆ ಶೇ 5ರಷ್ಟು ಇಳಿಕೆಯಾಗಿ ಶೇ 81ಕ್ಕೆ ತಲುಪಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಮತ್ತು ವಿಶ್ವಸಂಸ್ಥೆಯ ಅಂತರರಾಷ್ಟ್ರೀಯ ಮಕ್ಕಳ ತುರ್ತು ನಿಧಿ (ಯುನಿಸೆಫ್‌) ವರದಿ ನೀಡಿವೆ.

2021ರಲ್ಲಿ 2.5 ಕೋಟಿ ಮಕ್ಕಳು ಒಂದು ಅಥವಾ ಅದಕ್ಕಿಂತ ಹೆಚ್ಚಿನ ಡೋಸ್‌ ಡಿಟಿಪಿ ಲಸಿಕೆಯಿಂದ ವಂಚಿತರಾಗಿದ್ದಾರೆ. 1.8 ಕೋಟಿ ಮಕ್ಕಳು ಒಂದೂ ಡೋಸ್‌ ಡಿಟಿಪಿ ಲಸಿಕೆ ಪಡೆದಿಲ್ಲ. ಈ ಪೈಕಿ ಹೆಚ್ಚಿನವರು ಭಾರತ, ನೈಜೀರಿಯಾ, ಇಥಿಯೋಪಿಯಾ ಮತ್ತು ಫಿಲಿಪ್ಪೀನ್ಸ್‌ ದೇಶದವರು ಎಂದು ವರದಿ ತಿಳಿಸಿದೆ.