ಅನಾರೋಗ್ಯ: ಐಎಸ್‌ಎಸ್‌ನಿಂದ ಭೂಮಿಗೆ ಮರಳಿದ ಗಗನಯಾನಿ

ಕೇಪ್ ಕಾರ್ನಿವಲ್ (ಅಮೆರಿಕ): ಅನಾರೋಗ್ಯಪೀಡಿತ ಗಗನಯಾತ್ರಿ ಸೇರಿದಂತೆ ಮೂವರು ಗಗನಯಾತ್ರಿಗಳನ್ನು ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಿಂದ(ಐಎಸ್‌ಎಸ್‌) ನಾಸಾ ಗುರುವಾರ ವಾಪಸ್‌ ಕರೆಸಿಕೊಂಡಿದೆ.

ವೈದ್ಯಕೀಯ ಕಾರಣದಿಂದಾಗಿ ಗಗನಯಾತ್ರಿಗಳನ್ನು ವಾಪಸ್ ಕರೆಸಿದ ನಾಸಾದ ಮೊದಲ ತೆರವು ಕ್ರಮ ಇದಾಗಿದೆ. ಜನವರಿ 7ರಂದು ಅನಾರೋಗ್ಯದ ಬಗ್ಗೆ ನಾಸಾಗೆ ಮಾಹಿತಿ ಸಿಕ್ಕಿತ್ತು. ಆದರೆ, ಅನಾರೋಗ್ಯದಿಂದ ಬಳಲುತ್ತಿರುವ ಗಗನಯಾತ್ರಿ ಕುರಿತ ವಿವರಗಳನ್ನು ಅದು ಬಹಿರಂಗ ಪಡಿಸಿಲ್ಲ.

ಗಗನಯಾತ್ರಿಗಳಿದ್ದ ಸ್ಪೇಸ್‌ಎಕ್ಸ್‌ನ ಗಗನನೌಕೆ, 11 ಗಂಟೆಗಳ ಪ್ರಯಾಣದ ಬಳಿಕ ಸ್ಯಾನ್‌ ಡಿಗೋ ಬಳಿ ಪೆಸಿಫಿಕ್‌ ಸಾಗರದಲ್ಲಿ ಬಂದಿಳಿಯಿತು.