ಕಾಬೂಲ್‌ ವಿಮಾನ ನಿಲ್ದಾಣ ತಾಲಿಬಾನ್‌ ನಿಯಂತ್ರಣಕ್ಕೆ

ಕಾಬೂಲ್‌: ತಾಲಿಬಾನ್ ಮುಖಂಡರು ಇಲ್ಲಿನ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ರನ್‌ವೇನಲ್ಲಿ ನಡೆದಾಡಿದರು. ಆ ಮೂಲಕ, ‘ಅಮೆರಿಕದ ಪಡೆಗಳು ನಿರ್ಗಮಿಸಿದ್ದು, ಗೆಲುವು ನಮ್ಮದೇ. ಈಗ ವಿಮಾನ ನಿಲ್ಧಾಣ ನಮ್ಮ ನಿಯಂತ್ರಣದಲ್ಲಿದೆ’ ಎಂಬ ಸಂದೇಶವನ್ನು ರವಾನಿಸಿದರು.

ತಾಲಿಬಾನ್‌ ವಕ್ತಾರ ಝಬೀ ಉಲ್ಲಾ ಮುಜಾಹಿದ್‌ ಹಾಗೂ ಇತರ ಮುಖಂಡರು ಈ ರನ್‌ವೇನಲ್ಲಿ ನಡೆದಾಡಿದ ದೃಶ್ಯಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ನೇರ ಪ್ರಸಾರವನ್ನೂ ಮಾಡಲಾಗಿದೆ.

‘ಜಗತ್ತು ಈಗ ಪಾಠ ಕಲಿತಿದೆ. ನಮಗೆ ಈಗ ಸಂಭ್ರಮಿಸುವ ಕ್ಷಣ’ ಎಂದು ಮುಜಾಹಿದ್‌ ಹೇಳಿರುವುದು ಪ್ರಸಾರವಾಗಿದೆ.

ತಾಲಿಬಾನ್‌ ಅಧಿಕಾರಿಗಳು, ಖಾಲಿ ಇದ್ದ ರನ್‌ವೇನ ಚಿತ್ರೀಕರಣವನ್ನೂ ಮಾಡಿದ್ದಾರೆ. ಸಂಘಟನೆಯ ವಿಶೇಷ ಪಡೆಯ ಸದಸ್ಯರು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.